Breytt á stjórnarfundi KKÍ 6. september 2011

Yfirstjórn allra dómaramála skal vera í höndum þriggja manna nefndar. Nefndin nefnist dómaranefnd. Stjórn KKÍ skipar þrjá menn í nefndina. Formaður nefndarinnar er skipaður af stjórn KKÍ.

Nefndin raðar dómurum á alla leiki meistarflokks í Íslandsmótum, bikarkeppnum, fyrirtækjabikarmótum, meistarakeppnum og öðrum keppnum sem kann að verða komið á. Þá raðar nefndin dómurum á alla leiki í unglingaflokkum, alla undanúrslitaleiki og úrslitaleiki í öðrum flokkum, sem og alla leiki í bikarkeppni yngri flokka. Nefndin raðar einnig dómurum á aðra leiki og keppnir komi um það ósk frá stjórn KKÍ.

Dómaranefnd skal halda skrá yfir nöfn og réttindi dómara á vegum KKÍ og dómara sem dæma í fjölliðamótum félaga og hafa verið tilkynntir sem slíkir af sínum félögum til dómaranefndar.

Dómaranefnd skal skipuleggja og sjá um hið minnsta tvö dómaranámskeið í samvinnu við fræðslunefnd fyrir nýliða á hverju ári (ef þátttaka fæst), þar af annað snemma hausts. Dómaranefnd skal einnig skipuleggja og sjá um útgáfu og dreifingu upplýsinga um dómaramál. Dómaranefnd skal sjá um að boða til og halda þrekpróf fyrir starfandi dómara tvisvar á ári, að hausti áður en keppnistímabil hefst, og í janúar. Þá skulu starfandi dómarar boðaðir til fundar og samráðs fyrir upphaf keppnistímabils.

Dómaranefnd setur dómurum starfsreglur í upphafi keppnistímabils og kynnir félögum. Þá skulu haldnir kynningar- og samráðsfundir dómaranefndar og félaga. Starfandi dómarar, þjálfarar og forsvarsmenn félaga skal boða til fundanna. Fundinn skal halda fyrir upphaf keppnistímabils og oftar ef dómaranefnd KKÍ metur svo.

Dómaranefnd KKÍ er heimilt að sekta dómara mæti hann ekki í leik sem hann hefur verið settur á í niðurröðun dómaranefndar. Dómaranefnd skal í upphafi leiktíðar ákveða upphæð sektar. Sektarfjárhæðin rennur til KKÍ sem sér um innheimtu hennar.

Dómaranefnd skal skipa eftirlitsmann (commissioner) á alla leiki í úrslitakeppni úrvalsdeilda karla og kvenna og 1. deildar karla, á undanúrslit og úrslit bikarkeppni karla og kvenna og á úrslit í fyrirtækjabikarkeppni. Viðkomandi eftirlitsmaður skal hafa dómararéttindi og/eða FIBA-réttindi sem slíkur. Verksvið viðkomandi eftirlitsmanns skal vera hið sama og hjá eftirlitsmanni (commissioner) hjá FIBA og skal hann gefa umsögn um framkvæmd leiks og og dómgæslu til dómaranefndar. Nefndin hefur heimild til, að ósk stjórnar KKÍ eða að eigin frumkvæði, að skipa eftirlitsmann á aðra leiki ef þurfa þykir.

Dómaranefnd hefur heimild til að viðhalda skilvirku kerfi til einkunnagjafar á dómurum og dómgæslu þeirra. Útfærsla kerfisins er í höndum dómaranefndar hverju sinni. Dómaranefnd hefur heimild til að birta niðurstöður hvenær sem er á keppnistímabilinu eða í lok þess, sýnist nefndinni svo.

Dómaranefnd eða fulltrúi hennar skal hafa fastan viðverutíma á skrifstofu KKÍ á meðan keppnistímabil stendur yfir.