KR-ingarnir Einar Bollason og Kristinn Stefánsson sömdu fyrstu reglur aganefndar Körfuknattleikssambandsins, sem sett var á laggirnar í ársbyrjun 1972, og voru svo þeir fyrstu sem kærðir voru til nefndarinnar! Tvö fyrstu málin sem nefndin tók fyrir varðaði reyndar þá tvímenninga; þeir sluppu báðir með áminningu í fyrra skiptið en voru báðir úrskurðaðir í eins leiks bann í næsta skipti, tæpu ári síðar; Einar sem fyrsti þjálfarinn og Kristinn fyrstur leikmanna.

Það var eftir seinni deildarleikinn við ÍR í lok Íslandsmótsins 1972 sem aganefnd fékk fyrsta málið til meðferðar. Óttast var að þeir Kristinn og Einar yrðu jafnvel báðir í banni í aukaúrslitaleiknum. Morgunblaðið sagði svo frá daginn eftir leik: "KR-ingar voru að vonum mjög óánægðir með gang mála síðustu sek. leiksins gegn ÍR, og brauzt þessi óánægja þeirra illilega fram strax að leik loknum. Veittust þeir þá að dómurum leiksins, og var þar margt sagt sem betur hefði verið ósagt látið."

Dómarar leiksins voru Hörður Tuliníus og Erlendur Eysteinsson. Morgunblaðið sagði svo degi síðar, daginn sem aukaúrslitleikurinn fór fram: "Aganefnd Körfuknattleikssambandsins hefur nú lokið við að dæma í fyrstu kærunni sem hefur borist. - Eins og kunnugt er, þá voru þeir Kristinn Stefánsson og Einar Bollason báðir kærðir fyrir nefndinni, vegna atvika sem komu fyrir, eftir leik KR og ÍR. - Var almennt reiknað með að Kristinn myndi verða dæmdur í leikbann, en vafi lék á hvaða meðferð kæran á hendur Einari fengi. - Aganefndin hélt langan fund um málið í fyrrakvöld, en á meðan beið Kristinn Stefánsson fyrir utan dyrnar, ásamt tveimur lögfræðingum... Minna mátti það ekki vera."

Niðurstaða nefndarinnar var að ávíta báða leikmennina fyrir framkomuna eftir leikinn, en þeir mættu leika með í úrslitaleiknum.

Í fyrstu aganefnd sátu Jón Eysteinsson, sýslumaður í Keflavík, Guðmundur Árnason tannlæknir, og Guðni Ó. Guðnason kennari. Jón var fyrsti formaður nefndarinnar og lét ekki af því starfi fyrr en vorið 2004, eftir 32 ár sem formaður nefndarinnar. Formaður hennar í dag er H. Ágúst Jóhannesson.

Næsta mál sem agagnefnd fékk til meðferðar var ekki fyrr en tæpu ári seinna, einnig eftir leik KR og ÍR. Það var eftir fyrri leik liðanna, sem ÍR-ingar unnu, að Erlendur Eysteinsson, aðstoðardómari Kristbjörns Albertssonar, lagði fram kæru á hendur Einari, sem þá var þjálfari KR, og leikmanninum Kristni, fyrir óprúðmannlega framkomu og sérstaka ókurteisi í leikslok. Aganefnd úrskurðaði báða í eins leiks bann.

Einar var varaformaður KKÍ þegar reglur aganefndar voru samdar og henni komið á fót. Þegar nefndin tók til starfa var hann nýgenginn úr stjórn en þegar hann og Kristinn voru fyrstir allra úrskurðaðir í bann var Einar orðinn formaður KKÍ.

Með tilkomu nýs vefjar KKÍ er nú hægt að sjá alla dóma aganefndar frá upphafi.

Grein þessi er að mestu unnin upp úr bókinn Leikni framar líkamsburðum sem kom út árið 2001 og er skrifuð af Skapta Hallgrímssyni