Dómaranefnd hefur með höndum yfirstjórn allra dómaramála. Nefndin er skipuð þremur mönnum, tveir eru skipuðum af stjórn KKÍ og einn er kjörinn af starfandi dómurum. Formaður dómaranefndar er Hannes S. Jónsson og er hann skipaður af KKÍ ásamt Sigmundi Má Herbertssyni. Fulltrúi dómara í dómaranefnd er Helgi Bragason.

Eitt helsta hlutverk dómanefndar er að raða dómurum á leiki. Alls raðar nefndin dómurum á vel á annað þúsund leiki á hverju keppnistímili og hefur þeim leikjum nokkuð fjölgað í seinni tíð. Yfirleitt raðar nefndin niður á 2-3 vikur í senn og sendir út til dómara. Niðurröðun er vandasamt starf sem krefst mikillar útsjónarsemi því taka þarf tillit til ýmissa þátta. Nægir þar að nefna stöðu dómara, félag sem hann dæmir fyrir eða tengist, fjölda leikja á hvern dómara og að dómarar dæmi ekki alltaf á sömu stöðunum eða hjá sömu liðunum. Einnig sendir fjöldi dómara nefndinni vaktaplön og upplýsingar um daga sem þeir eru ekki til reiðu til dómgæslu. Það er því ljóst að mikill tími nefndarmanna fer í niðurraðanir.

Það er einnig hlutverk dómaranefndar að standa fyrir dómaranámskeiðum fyrir aðila sem hyggjast hefja dómgæslu. Árlega eru haldin 4-5 slík námskeið víða um land. Þar að auki skipuleggur dómaranefnd, í samstarfi við Körfuknattleiksdómarafélag Íslands haustfund dómara, en hann markar upphaf tímabilsins hjá dómurum. Á haustfundum er farið yfir reglubreytingar og áherslur auk þess sem dómarar þreyta skriflegt próf og þrekpróf. Þar fyrir utan skipulegggur dómaranefnd þrekpróf með reglulegu millibili fyrir starfandi dómara.

Dómurum er skipað í flokka. Flokkaskiptingin segir til um hvaða leiki dómarar hafa réttindi til að dæma. Dómaranefnd heldur utan um þessa skráningu og ákveður flokkaskiptinguna. Einnig heldur nefndin utan um heildarskrá yfir starfandi dómara og er sú skrá öllum aðgengileg á kki.is.

Auk þess að raða dómurum á leiki raðar nefndin niður eftirlitsdómurum á leiki í úrslitakeppnum, úrslitaleiki í bikarkeppnum og einnig þá leiki sem nefndin telur nauðsynlegt að skipa eftirlitsdómara á.

Þar fyrir utan er dómaranefnd heimilt að starfrækja kerfi til einkunnagjafar á dómurum og störfum þeirra. Slíkt kerfi hefur þó ekki verið starfrækt undanfarin ár.