Ár 2005, mánudaginn 31. október er dómþing körfuknattleiksdómstóls KKÍ sett og háð af Boga Hjálmtýssyni, að Bæjarhrauni 18, Hafnarfirði.

Fyrir er tekið:
Mál nr. 7/2005;
Körfuknattleiksdeild Keflavíkur.
gegn
Dimitar Karadzovski.

Í málinu er kveðinn upp svofelldur

DÓMUR.

I.
Mál þetta var móttekið af skrifstofu KKÍ þann 19. októeber 2005. Kærandi er Körfuknattleiksdeild Keflavíkur, kt., Hringbraut 108, 230 Keflavík. Kærður er Dimatar Karadzvoski leikmaður með Körfuknattleiksdeild Skallagríms.
Undirritaður dómari í dómstól KKÍ tók við málinu þann 27. október s.l.

Dómkröfur kæranda;
Kærandi krefst þess að í leik Skallagríms og Keflavíkur sem fram fór þann 16. október 2005, í Iceland Express deild karla verði kæranda dæmdur 20-0 sigur.
Kærandi gerir einnig þá kröfu að ef Skallagrímur verði jafnt Keflavík að stigum í lok deildarkeppni geti Skallagrímur aldrei verið ofar í töfluröð en Keflavík.

Eftirtalin skjöl hafa verið lögð fram í málinu;
Nr. 1 kæra dags. 19. október 2005.
Nr. 2 afrit leikskýrslu.
Nr. 3 útskrift af heimasíðu KKÍ varðandi félagaskipti.
Nr. 4 staðfesting framkvæmdastjóra KKÍ dags. 31. október 2005.

II.
Sem rökstuðning fyrir kröfum sínum um 20-0 sigur í leiknum vísar kærandi til 1.gr.. reglugerðar um erlenda leikmenn þar sem fram kemur að þeir leikmenn sem hafa ríkisfang Evrópulands og hafa heimild til að spila hér á landi samkvæmt reglum FIBA, skulu undirgangast sömu reglur og gilda um íslenska leikmenn. Félagaskipti leikmanns með evrópskt ríkisfang milli íslenskra félaga lúta reglugerð KKÍ um félagaskipti. Ef um er að ræða félagaskipti leikmanns með evrópskt ríkisfang úr félagi utan Íslands, en þó innan FIBA, gilda reglur FIBA, sbr. reglugerð KKÍ um félagaskipti. Þá er vísað til heimasíðu KKÍ þar sem fram komi í félagaskiptaskjali að Dimitar Karadzovski sé ekki löglegur leikmaður Skallagríms fyrr en 29. október 2005 og skv. 2. gr.a) og b) reglugerðar KKÍ um félagaskipti teljist tímabilið 1. september til 30. apríl vera leiktímabil samkvæmt reglugerðinni og að leikmaður sem óskar félagaskipta á keppnistímabili verði löglegur með hinu nýja félagi einum mánuði eftir móttöku beiðni um félagaskipti á skrifstofu KKÍ og þar sem þessi mánuður hafi ekki verið liðinn sé leikmaðurinn ekki með leikheimild.
Ekki fylgir rökstuðningur varðandi þá kröfu kæranda að ef Skallagrímur verði jafnt Keflavík að stigum í lok deildarkeppni geti Skallagrímur aldrei verið ofar í töfluröð en Keflavíkur.
III.
Eins og máli þessu er háttað þá er kærður Dimitar Karadzovski leikmaður Skallagríms. Kröfur kæranda snúa hins vegar að úrslitum í leik Körfuknattleiksdeildar Skallagríms og Körfuknattleiksdeildar Keflavíkur sem fram fór þann 16. október 2005, í Iceland Express deild karla og um stöðu þessara félaga í töfluröð í lok deildarkeppni. Ljóst má vera að Dimitar Karadzovski er ekki fyrirsvarsmaður Körfuknattleiksdeildar Skallagríms og getur því ekki verið aðili að kröfum kæranda og því er málið ekki tækt til meðferðar.

Samkvæmt framansögðu er það niðurstaða dómsins að málinu skuli vísað frá dómi.

Bogi Hjálmtýsson, dómari í dómstól KKÍ kveður upp dóm þennan.

DÓMSORÐ.

Kæru Körfuknattleiksdeildar Keflavíkur gegn Dimitar Karadzovski er vísað frá dómi.

Bogi Hjálmtýsson, dómari í dómstól KKÍ.


Kærandi hefur þriggja daga frest til þess að skjóta málinu aftur fyrir dómstólinn sbr. 2.mgr. 5.gr. laga um dómstól KKÍ.

Dómurinn er sendur til KKÍ í tölvupósti. KKÍ skal birta dóminn fyrir málsaðilum og á heimasíðu KKÍ í samræmi við ákvæði 17. gr. laga um dómstól KKÍ.