- Sævar Gunnarsson í stuttu spjalli

Stuðningsmenn liða skipta gríðarlega miklu máli í allri umgjörð kappleikja. Ef þeirra nyti ekki við yrði örugglega ekki eins skemmtilegt fyrir leikmenn að spila. Sem betur fer eiga öll lið landsins góða og dygga stuðningsmenn sem styðja lið sitt í gegnum þykkt og þunnt. Einn slíkur er Sævar Gunnarsson sem missir nánast aldrei af leik hjá ÍR en sonur hans, Ómar Sævarsson, er einn lykilmanna Breiðhyltinga.
Heimasíða KKÍ tók hús á Sævari á dögunum og lék forvitni á að vita hvenær hann byrjaði að fylgjast svona vel með körfuboltanum.

* Akstur um nánast allar helgar
Mig minnir að Ómar hafi byrjað að æfa 11 eða 12 ára gamall. Upp frá því byrjaði maður að skutla stráknum á æfingar og túrneringar og fljótlega var ég orðinn eins og einkabílstjóri fyrir hann og vinina, Óla (Ólafur J. Sigurðsson) og Hregga (Hreggviður Magnússon) og marga fleiri, segir Sævar og hlær við. Þetta var hörkuárgangur sem ÍR var með, þ.e. 1982 árgangurinn, svo maður gat ekki annað en fylgst með strákunum. Ég man líka vel eftir öðrum liðum eins og t.d. Stólunum sem voru með hörkugott og skemmtilegt lið og að ekki sé minnst á KR-ingana með Jón Arnór Stefánsson í broddi fylkingar. ÍR-ingar háðu margar minnistæðar rimmur við þessi tvö lið sem gaman var að fylgjast með.


* Fækkun Kana til fyrirmyndar
Eins og flestir körfuknattleiksunnendur vita verður hverju liði aðeins heimilt að tefla fram einum Bandaríkjamanni í vetur. Í mínum huga er þessi breyting, þ.e. aðeins einn Kani í hverju liði, til mikilla bóta, segir Sævar, vissulega verður þetta til þess að Evrópubúum mun fjölga talsvert í deildinni en ég held að það verði bara til þess að auka víddina í körfuboltanum. Evrópubúar leika leikinn talsvert á annan hátt en Bandaríkjamenn. Í sannleika sagt skil ég ekki hvernig íslenskir leikmenn eiga að verða betri þegar þrír erlendir leikmenn spila allt að 40 mínútur í leik eins og var hjá sumum liðum síðasta vetur. Vitaskuld æfa þeir með þeim og verða betri á þann veg en menn verða að fá að spila leiki til þess að auka getu sína.


* Breyting til batnaðar hjá ÍR
Hvernig koma ÍR-ingar undirbúnir fyrir keppnistímabilið að mati Sævars? Mér líst vel á mitt lið fyrir veturinn. Ég held að það hafi verið nauðsynlegt að skipta um þjálfara á haustdögum þar sem mér sýndist heldur lítið um aga hjá Spánverjanum Oscar Pedroche. Dóri (Halldór Kristmannsson) og Jón Örn (Guðmundsson) eru ÍR-ingar í húð og hár og þekkja innviði félagsins afar vel; þeir vita hvað þarf til þess að ná árangri. Ég hef séð nokkra æfingaleiki og leiki í Reykjavíkurmótinu með mínum mönnum og er greinlegt að þeir félagar eru á réttri leið með liðið. Ég reyni að sjá alla leiki ÍR á höfuðborgarsvæðinu, bæði æfinga- og alvöruleiki. Það er harður kjarni í kringum liðið sem fylgir því og samanstendur hann af stjórn deildarinnar, foreldrum og öðrum stuðningsmönnum. Svo er ég kominn með nýtt hlutverk á heimaleikjum í vetur og verð ég á moppunni. Búið er að fjárfesta í nýju skafti og moppu og verður gólfið í Hellinum alltaf þurrt og tandurhreint – því skal ég lofa!