Ár 2004, þriðjudaginn 30. nóvember er dómþing dómstóls Körfuknattleikssambands Íslands háð af Halldór Halldórssyni formanni dómsins.

Fyrir er tekið:
Mál nr. 7/2004
Leiknir, körfuknattleiksdeild
gegn
ÍR, körfuknattleiksdeild.

Í málinu er kveðinn upp svofelldur

DÓMUR

I
Mál þetta er móttekið af skrifstofu KKÍ 25. þessa mánaðar og gögn málsins send formanni dómsins með símbréfi sama dag. Kærandi er Körfuknattleiksdeild Leiknis Reykjavík. Kærði er Körfuknattleikdeild ÍR, Reykjavík

Dómsformaður ákvað að málið skyldi sæta flýtimeðferð skv. 8. gr. laga um dómstól KKÍ.

Dómkröfur.
Kærandi krefst þess að úrslit leiks Leiknis gegn ÍR-b í 2. deild meistaraflokks karla sem fram fór sunnudaginn 21. nóvember sl. verði dæmd ógild og kæranda dæmdur sigur í leiknum 20-0.

Kærði gerir engar kröfur í málinu.

Eftirtalin skjöl hafa verið lögð fram í málinu. Nr. 1 kæra. Nr. 2 leikskýrsla leiks aðila málsins sem fram fór 21. febrúar sl. Nr. 3 útprentun úr gagnagrunni ÍSÍ varðandi leikjafjölda leikmanna kærða o.fl. Nr. 4 tölvupóstur formann dómstóls KKÍ til forsvarsmanns kærða. Nr. 5 svar forsvarsmann kærða.

II
Dómari málsins gaf kærða frest til að til að tjá sig um málið og það gerði hann með dómskjali nr. 5.
Sem rökstuðning fyrir kröfum sínum vísar kærandi til 22. gr. reglugerðar um körfuknattleiksmót. Í nefndri grein kemur m.a. fram að félögum innan KKÍ sé heimilt að senda B-lið í keppni í 2. deild. Þegar um B-lið er að ræða er 7 leikjahæstu leikmönnum A-liðs hverju sinni ekki heimil þátttaka með B-liði. Séu tveir eða fleiri leikmenn með jafn marga leiki í 7. sæti í meistaraflokki karla A-liða, er ekki heimilt að nota einn þeirra með B-liði.
Í kæru er því haldið fram að kærði hafi notað ólöglegan leikmann í umræddum leik, Ólaf Þórisson en hann sé á meðal 7 leikjahæstu leikmanna A-liðs kærða.
Kærði kveður það rétt hjá kæranda að nefndur leikmaður sé á meðal 7 leikjahæstu leikmanna A-liðs ÍR og kvaðst hann ekki halda uppi vörnum í málinu.

III
Niðurstaða.
Þegar fyrir lá yfirlýsing kærða þess efnis að fallist var á að leikmaðurinn sé á meðal 7 leikjahæstu leikmanna A-liðs kærða ákvað formaður dómstóls KKÍ að dæma málið sjálfur í samræmi við niðurlagsákvæð 8. gr. laga um dómstól KKÍ.
Að framan er rakið ákvæði 22. gr. reglugerðar um körfuknattleiksmót varðandi heimild leikmanna A-liða til að leika með B-liði félags í 2. deild. Ekki er um það deilt að þeir leikmaður sá sem kærandi nefnir í kæru sinni var á meðal 7 leikjahæstu leikmanna með A-liðið og því var kærða óheimilt að tefla honum fram í umræddum leik og var lið kærða þannig ólöglega skipað. Þegar af þessari ástæðu verður að taka kröfu kæranda til greina. Samkvæmt 2. mgr. 11. gr. reglugerðar um körfuknattleiks-mót telst lið sem ólöglega er skipað hafa tapað leik í samræmi við reglur FÍBA hverju sinni. Reglur FÍBA sem hér er vísað til, grein 30 liður 2.1, kveða á um að lið sem tapar leik af einhverjum ástæðum tapi honum með stigatölunni 20-0. ÍR-b því hafa tapað nefndum leik með stigatölunni 20-0.
Hér er um fyrsta brot kærða að ræða og með hliðsjón af því og eðli brotsins verður kærða ekki gert að greiða sekt til KKÍ að þessu sinni. .

Halldór Halldórsson formaður dómstóls KKÍ kveður upp dóm þennan.

DÓMSORÐ.
ÍR-b telst hafa tapað leik gegn Leikni Reykjavík í 2. deild karla sem fram fór 21. nóvember 2004 með stigatölunni 0-20.

Halldór Halldórsson.

Dómurinn er sendur til KKÍ í tölvupósti og skrifstofu sambandsins falið að birta dóminn fyrir aðilum. Dóminn skal birta á heimasíðu KKÍ í samræmi við ákvæði 17. gr. laga um dómstóla KKÍ.