Keflavíkurliðið er vel skipað og hungrað í titil. Liðið býr yfir gríðarlegri reynslu, ekki síst vegna endurkomu Fals, Alberts og Bigganna, þeirra Birgis Arnar Birgissonar og Birgis Guðfinnssonar. Á hinn bóginn eru ungu mennirnir, Magnús Gunnarsson og Jón Norðdal Hafsteinsson, í mikilli framför þessa dagana og gætu skipað sér í hóp bestu leikmanna landsins eftir veturinn.

Þar fyrir utan höfum við leikmenn í landsliðsklassa eins og Hjört, Guðjón og Gunna Einars, þannig að sjá má að breiddin er mikil. Calvin Davis er góður miðherji, bæði í vörn og sókn og gefur liðinu gott jafnvægi.

Liðið hefur undanfarin ár spilað mjög hraðan bolta og skotið mikið af langskotum. Það hefur nú á að skipa hávaxnari leikmönnum en oft áður og hefur þannig meiri möguleika, þ.e.a.s. ekki þarf að byggja eins mikið á langskotum, heldur á liðið að geta óhikað sótt að körfunni, meira en oft áður.

Fyrir utan þá leikmenn sem taldir hafa verið upp er fullt af ungum og efnilegum leikmönnum sem eru að berjast um sæti í liðinu. Helst má þar nefna Gunnar Stefánsson og Sæmund Oddsson, sem er óðum að ná sér af erfiðum meiðslum.

Keflavíkurliðið mun hafa það að sínu markmiði nú sem endranær, að spila skemmtilegan og árangursríkan körfuknattleik. Bestu kveðjur til áhorfenda og mótherja með von um skemmtilegan körfuknattleiksvetur.