Hamarsmenn urðu í kvöld áttunda og síðasta liðið til að tryggja sér sæti í úrslitakeppni Intersportdeildarinnar í körfubolta þegar Hamar vann deildarmeistara Grindavíkur, 87-74, á heimavelli sínum í Hveragerði. Aðeins sex dögum áður voru Hamarsmenn að berjast fyrir lífi sínu í deildinni en með þremur sigrum í síðustu þremur leikjunum komst Hamar í úrslitakeppnina líkt og undanfarin þrjú ár og öll árin sem liðið frá Hveragerði hefur verið í úrvalsdeildinni.

Staða neðstu liðanna fyrir leiki 27. febrúar:
5. Tindastóll 10-9
6. Njarðvík 10-9
7. ÍR 10-9
8. Snæfell 8-11
-------------------------
9. Breiðablik 7-12
10. Hamar 5-14
11. Skallagrímur 4-15
12. Valur 3-16

Staða neðstu liðanna eftir leiki 6. mars (6 dögum síðar):
5. Njarðvík 13-9
6. Tindastóll 12-10
7. ÍR 11-11
8. Hamar 8-14
-------------------------
9. Snæfell 8-14
10. Breiðablik 7-15
11. Valur 5-17
12. Skallagrímur 4-18

Ár Hamars í úrvalsdeild:
1999-2000 8. sæti 9 sigrar -13 töp 40,9%
2000-2001 6. sæti 13- 9 59,1%
2001-2002 6. sæti 11-11 50,0%
2002-2003 8. sæti 8-14 36,4%

Í öðrum leikjum kvöldsins tryggðu Haukar sér 3. sætið með 80-64 sigri á KR í úrslitaleik um bronsið og Tindastóll hafði betur, 76-86, í úrslitaleik gegn ÍR um 6. sætið í deildinni. Þá hjálpuðu Reykjanesbæjarliðin Hamarsmönnum með sigrum á keppninautum þeirra um áttunda sætið, Keflavík vann Snæfell, 108-83, og Njarðvík lagði Breiðablik 80-72. Að lokum unnu Valsmenn, Skallagrím, 99-96, í uppgjöri fallliðanna og það verða því Borgnesingar sem reka lestina í ár.

Í átta liða úrslitum úrslitakeppninnar mætast eftirtalin lið en fyrstu leikir úrslitakeppninnar fara fram fimmtudaginn 13. mars.
Grindavík (1.) - Hamar (8.)
Keflavík (2.) - ÍR (7.)
Haukar (3.) - Tindastóll (6.)
KR (4.) - Njarðvík (5.)