Grindavík varð í kvöld deildarmeistari í Intersportdeild karla eftir 105-80 sigur á liði Hauka á heimavelli sínum í Grindavík. Með þessum sigri er ljóst að ekkert lið getur fengið fleiri stig en þau 34 sem Grindavík hefur fengið í deildinni í vetur og þar sem Keflavík, eina liðið sem getur náð þeim að stigum, tapaði báðum innbyrðisviðureignum liðanna er ljóst að Grindvíkingar eru deildarmeistarar líkt og þeir voru í úrvalsdeildinni 1994 og 1998.

Þetta var áttundi heimasigur Grindavíkurliðsins í röð í deildinni í Röstinni en alls vann liðið 10 af 11 heimaleikjum sínum í vetur. Vinni Grindavíkurliðið alla heimaleiki sína sem þeir eiga eftir verða þeir deildarmeistarar.

Með þessu er jafnframt ljóst að deildarmeistaratitilinn dvelur á Suðurnesjum þrettánda árið í röð en Njarðvík (5), Keflavík (5) og Grindavík (3) eru einu liðin sem hafa unnið þennan bikar frá árinu 1990 er KR varð deildarmeistari.

Flestir deildarmeistaratitlar í úrvalsdeild 1984-2003:
11 - Njarðvík (1984-1989, 1991, 1995, 1996, 2000, 2001)
5 - Keflavík (1992, 1993, 1997, 1999, 2002)
3 - Grindavík (1994, 1998, 2003)
1- KR (1990)

Helgi Jónas Guðfinnsson skoraði 31 stig á 28 mínútum fyrir Grindavík og þeir Guðlaugur Eyjólfsson og Páll Axel Vilbergsson, fyrirliði, voru með 18 stig hvor en liðið lék í leiknum án bandaríska leikmanns síns, Darrel Lewis, sem lék ekki vegna meiðsla sem hann hlaut í leik gegn Njarðvík á föstudaginn. Lewis hefur gert 27,6 stig að meðaltali í vetur auk 9,7 frákasta og 5,4 stoðsendinga.

Grindvíkingar hittu úr 18 af 30 þriggja stiga skotum sínum í leiknum, þar af 13 af 17 í öðrum (8/7) og þriðja leikhluta (9/6). Þetta gerir 60% skotnýtingu fyrir utan þriggja stiga línuna. Grindavíkurliðið hitti meðal annars úr 8 þriggja stiga skotum í röð í þessum leik. Þeir Helgi Jónas Guðfinnson og Guðlaugur Eyjólfsson gerðu báðir sex þriggja stiga körfur úr aðeins sjö tilraunum og Guðlaugur hefur hitt úr 14 af 17 þriggja stiga skotum sínum í síðustu tveimur leikjum því hann hitti úr 8 af 10 skotum fyrir utan þriggja stiga línuna í 99-94 tapi í Njarðvík á föstudagskvöldið.

Þetta er sjötti leikurinn í Intersportdeildinni í vetur þar sem Grindavíkurliðið hittir úr meira en 50% þriggja stiga skota sinna.

Bestu skotsýningar Grindvíkinga í þriggja stiga skotum í vetur:
65,4% - 26/17 - 103-101 sigur á Breiðabliki í Smáranum
60% - 30/18 - 105-80 sigur á Haukum á heimavelli
56,5% - 23/13 - 115-107 sigur á Hamri á heimavelli
53,8% - 26/14 - 110-60 sigur á Val á Hlíðarenda
52% - 25/13 - 105-95 sigur á Haukum á Ásvöllum
50% - 22/11 - 110-85 sigur á ÍR á heimavelli