Það urðu mikil tímamót í körfunni í kvöld því Teitur Örlygsson lék þá sinn 400. úrvalsdeildarleik í 60-63 sigri Njarðvíkur á Snæfelli í Stykkishólmi en þessi leikur var hluti af 17. umferð Intersportdeildarinnar. Teitur er að leika sitt 19. tímabil í úrvalsdeild en hann lék sinn fyrsta leik rétt fyrir jólin 1983 þá 16 ára eða nánar tilgetið 15. desember 1983 í 76-64 sigri Njarðvíkinga á Haukum í Ljónagryfjunni.

Teitur hefur fjögurra leikja forskot á Val Ingimundarson, spilandi þjálfara Skallagríms, sem mun að öllum líkindum leika sinn 397. leik gegn KR annað kvöld. Í þriðja sæti er síðan Guðjón Skúlason sem hefur leikið 392 leiki í úrvalsdeild.

Teitur Örlygsson hefur 10 sinnum orðið Íslandsmeistari í körfubolta með Njarðvík og í öll skiptin eftir að hafa farið í gegnum úrslitakeppni. Agnar Friðriksson hjá ÍR varð einnig Íslandsmeistari í 10 skipti í gömlu 1. deildinni frá 1962-1977 en enginn leikmaður hefur unnið oftar titilinn í úrvalsdeild. Auk þessa hefur Teitur unnið bikarinn sjö sinnum og því alls 17 stóra titla á þeim 19 tímabilum sem hann hefur leikið á Íslandi.

Flestir leikir í úrvalsdeild:
400 leikir - Teitur Örlygsson (Njarðvík, 1983-)
396 - Valur Ingimundarson (Njarðvík, Tindastóll, Skallagrímur, 1979-)
392 - Guðjón Skúlason (Keflavík, Grindavík, 1983-)
335 - Marel Guðlaugsson (Grindavík, KR, Haukar, 1988-)
331 - Jón Arnar Ingvarsson (Haukar, Breiðablik, 1988-)
327 - Friðrik Ragnarsson (Njarðvík, KR, 1988-)
321 - Guðmundur Bragason (Grindavík, Haukar, 1987-
319 - Tómas Holton (Valur, Skallagrímur, 1982-2000)
316 - Birgir Mikaelsson (KR, Skallagrímur, Snæfell, Breiðablik, 1981-2001)
307 - Jón Kr. Gíslason (Keflavík, Grindavík, 1982-1997)

Þótt að Teitur Örlygsson sé fyrsti leikmaðurinn til að leika 400 leiki í úrvalsdeild karla þá hefur einn maður afrekað það að taka þátt í 400 úrvalsdeildarleikjum. Sá er dómarinn Kristinn Albertsson sem hefur dæmt 431 leik í úrvalsdeild. Kristinn dæmdi sinn 400. leik 21, janúar 2001 og má sjá grein um þau tímamót á kki.is hér.

Undir greinum á KKÍ-síðunni má finna hér úttekt á afreki Teits þar sem farið er ofan í tölfræðina á bak leikina 400 auk annarra skemmtilegra upplýsinga um feril sigursælasta og leikjahæsta leikmann úrvalsdeildar frá upphafi.