KKÍ og Pétur Guðmundsson hafa ákveðið að fara af stað með verkefni þar sem félögum verður boðið að senda unga hávaxna leikmenn í sérþjálfun reglulega það sem eftir er vetrar. Markmiðið er að gefa þessum strákum auka aðhlynningu og tækifæri til að spreyta sig á móti öðrum stórum strákum þar sem það tekur stóra stráka á þessum aldri lengri tíma að ná valdi á líkama sínum. Hugmyndin er að vera með vikulegar eða hálfsmánaðarlegar æfingar fyrir leikmenn sem munu fyrst og fremst spila stöðu framherja og miðherja.

Leikmennirnir munu fá sérhæfða einstaklingsleiðsögn frá Pétri þar sem farið verður yfir allar undirstöðuhreyfingar í þessum stöðum, bæði í vörn og sókn. Með því að vinna í 6-8 manna hópum gefst tækifæri til einstaklingsvinnu en jafnframt býðst þeim að spreyta sig á móti jafnöldrum á svipuðu skeiði og svipaðri hæð.

Einnig mun Pétur fara í sálfræði þess að vera stór, bæði sem leikmaður í körfubolta og í daglegu lífi. Eins og þið allir vitið er ekkert offramboð af leikmönnum yfir 2 metra á Íslandi og eru nokkrar kenningar í gangi hvers vegna. Ein kenningin er sú að foreldrar hávaxinna barna sjá fyrir sér að barnið verði lagt í einelti og það muni aldrei passa inn í þjóðfélagið. Til þess að forðast óþægindi eins og að þurfa að sérpanta föt og rúm, taka foreldrar oft þá ákvörðun að láta stöðva vöxtinn áður en barnið fer yfir “freak” mörkin, þ.e.a.s. 2 metrana. Leikmönnum verður gefið tækifæri til að miðla af reynslu sinni svo hægt verði að eyða fordómum um hávaxið fólk. “Life is too short to be small” verður okkar mottó verkefnisins!

KKÍ mun greiða allan þjálfara og húsnæðiskostnað af þessu verkefni, en æfingarnar verða á Reykjavíkursvæðinu. Vonast er til þess að þessi hugmynd fái góðar undirtektir og skilning þar sem það gefur auga leið að einhverjir þessara drengja verði að fá frí frá æfingum ykkar þegar þeir mæta á þessara sér æfingar.

Ef þú ert eða veist um drengi á aldrinum 14 – 19 ára sem þið teljið að hafi getu og hæð myndi vilja vera með í þessu verkefni, sendið nafn og upplýsingar til Péturs í peturkarl@strik.is eða hafið samband við Pétur í GSM 895-1058.
Ef vel tekst til með þetta verkefni verður sambærilegt verkefni sett upp fyrir stúlkur.

mt: Pétur Guðmundsson treður með tilþrifum í leik með Los Angeles Lakers.