Stjörnuleikur KKÍ verður haldinn þann 11. janúar nk. að Ásvöllum í Hafnarfirði. Leikurinn verður með nýju sniði að þessu sinni. Bæði hvað varðar liðin sjálf og hvernig þau eru valin. Ber þar hæst að þú, lesandi góður, getur tekið þátt í að velja byrjunarliðin hér á kki.is

Liðin eru tvö og er skipt í Norður og Suður. Í Norðrinu eru ÍR, KR, Skallagrímur, Snæfell, Tindastóll og Valur, en í Suðrinu eru Breiðablik, Grindavík, Hamar, Haukar, Keflavík og Njarðvík.

Reglurnar eru þær að þú velur fimm leikmenn (tvo framherja, einn miðherja og tvo bakverði) í hvort lið. Fjöldi erlendra leikmanna takmarkast við tvo í hvoru byrjunarliði, en þjálfara er heimilt að velja tvo erlenda leikmenn til viðbótar eftir að byrjunarliðið hefur verið gert opinbert.

Þjálfarar liðanna verða þjálfarar efstu liðanna úr hvorum landshluta þegar Intersport-deildin er hálfnuð. 11. umferð líkur með leik Breiðabliks og Njarðvíkur í Smáranum 21. desember kl. 14:00, en sá leikur verður sýndur beint á RÚV. Að honum loknum er deildin hálfnuð.

Smellið á merki Stjörnuleiksins hér til vinstri á síðunni og takið þátt í kosningunni.