Leik Íslendinga og Úkraínumanna er lokið í Evrópukeppni unglingalandsliða, 20 ára og yngri. Íslendingar sigruðu örugglega 84-65 (43-41). Eins og áður byrjaði íslenska liðið vel og náðu 11 stiga forystu, 22-11, en þá kom slæmur kafli og Úkraínumenn náðu að jafna og komast yfir. Eftir nokkurra mínútna leik í seinni hálfleik tóku Íslendingar leikinn í sínar hendur og sigruðu eins og áður segir örugglega. Íslenska liðið lék mjög vel og var það aðeins inn í teignum sem Úkraínumenn áttu möguleika enda hávaxnari en Íslendingar. Sævar Sigurmundsson var besti maður íslenska liðsins og skoraði 20 stig. Örlygur Sturluson, 19 stig, og Logi Gunnarsson, 18 stig, voru einnig góðir. I. Magni Hafsteinsson, 10 stig, og Ísak Einarsson, 7 stig, börðust líka vel. Morten Szmiedowicz skoraði 6 stig og aðrir minna.
Stöðuna í mótinu og önnur úrslit er hægt að finna á heimasíðu Sænska körfuknattleikssambandsins og þar vinstra megin undir Landslag er valið Spelprogram och resultat EM-kval U20 Herrar , á miðri þeirri siðu er svo valið Resultat (uppdateras efter varje match) og þá koma öll úrslit í mótinu og staðan.