Íslenska karlalandsliðið í körfubolta hefur ekki enn náð að vinna þjóð frá fyrrum Júgóslavíu í Evrópukeppninni í körfubolta í Laugardalshöllinni en fær tækifæri til þess að breyta því á móti Bosníu í kvöld.

Ísland hefur spilað alls sjö heimaleiki í Evrópukeppni á móti þjóðum fyrrum Júgóslavíu frá því að sterkasta körfuboltaþjóð Evrópu (Heimsmeistarar 1990 - Evrópumeistarar 1989 og 1991) skiptist upp í byrjun tíunda áratugarins.

Það hefur verið jákvæð þróun úr úrslitum íslenska liðsins í síðustu heimaleikjum sínum á móti þessum sterku körfuboltaþjóðum því liðið hefur náði betri úrslitum í þremur heimaleikjum í röð allt frá því að tapa með 19 stigum á móti Makedónúu í janúar 2011 í það að tapa með aðeins 9 stigum á móti Svartfjallalandi fyrir tæpum tveimur árum.

Bestu úrslit íslenska liðsins á móti þjóð frá fyrrum Júgóslavíu í Laugardalshöllinni voru þó fyrir tæpum 17 árum þegar liðið skaut Króötum skelk í bringu í Höllinni.

Króatar unnu á endanum átta stiga sigur, 82-74, eftir hörkuleik en allir bestu og þekktustu leikmenn króatíska liðsins voru mættir í Höllina. Helgi Jónas Guðfinnsson, núverandi þjálfari Keflavíkur, átti frábæran leik og skoraði 21 stig í leiknum.

Heimaleikir í Evrópukeppni á móti þjóðum frá fyrrum Júgóslavíu:

8. september 2012 í Laugardalshöll
9 stiga tap á móti Svartfjallalandi (92-101)

14. ágúst 2012 í Laugardalshöll
13 stiga tap á móti Serbíu (78-91)

17. september 2008 í Laugardalshöll
14 stiga tap á móti Svartfjallalandi (66-80)

24. janúar 2001 í Laugardalshöll
19 stiga tap á móti Makedóníu (83-102)

29. nóvember 2000 í Laugardalshöll
10 stiga tap á móti Slóveníu (80-90)

24. febrúar 1999 í Laugardalshöll
29 stiga tap á móti Bosníu (54-83)

3. desember 1997 í Laugardalshöll
8 stiga tap á móti Króatíu (74-82)