Íslendingar mættu Englendingum í Evrópukeppni 18 ára og yngri B-deild. Fyrir leikinn hafði íslenska liðið leikið 1 leik við Ísraela og tapaði þeim leik, en Ísraelar hafa leikið vel í mótinu og unnið alla sína leiki í riðlinum hingað til. Áður en að þessum leik kom höfðu Englendingar sigrað Dani örugglega en tapað fyrir Ísraelum með litlum mun. Það var því mikilvægt fyrir Íslendinga að sigra þennan leik.

Íslensku stelpurnar voru ákveðnari í upphafi leiks og spiluðu frábæra vörn. Þjálfararnir ákváðu að spila „þríhyrning og tvo“ í varnarleiknum og settu „frakka“ á tvo skæðustu bakverði Englendinga. Þetta herbragð heppnaðist vel í fyrri hálfleik og hélt íslenska liðið Englendingum í aðeins 6 stigum í 1. leikhluta og aðeins 16 stigum í fyrri hálfleik. Þar af komu 12 stig þeirra af vítalínunni og Englendingar þurftu að berjast fyrir hverju stigi.

Sóknarleikur íslensku stelpnanna gekk brösulega framan af enda enska liðið líkamlega sterkt og hávaxið. Liðið hafði þó góða forystu þegar flautað var til hálfleiks 25-16 og varnarleikurinn var til fyrirmyndar. Slæmu fréttirnar voru þó að stóru stelpurnar, Elsa Rún og Sandra Lind, voru báðar komnar með 3 villur eftir harða baráttu við hávaxna liðsmenn Englendinga.

Enska liðið kom gríðarlega einbeitt til leiks í seinni hálfleik og greinilegt að það ætlaði sér að var upp sækja grimmt á stóru leikmenn íslenska liðsins sem voru í villuvandræðum. Elsa Rún fékk snemma sína 4. villu og skömmu seinna sína fimmtu og munaði miklu þar um því hún hafði spilað frábærlega fram að þeim tíma. Áfram gekk íslensku stelpunum illa að finna smugur í sóknarleiknum og skot utan af velli rötuðu ekki rétta leið. Með harðri baráttu komust Englendingar yfir í 3. leikhluta og höfðu yfir að honum loknum 41-33.

Í lokaleikhlutanum lagði íslenska liðið allt í sölurnar og á tímabili virtist sem að liðinu myndi takast að ná Englendingum en eftir að Sandra Lind fékk sína 5. villu var róðurinn erfiðari. Lokatölur í leiknum voru 57-45 fyrir Englendingum og gengu stelpurnar súrar af velli eftir að hafa lagt allt í sölurnar í leiknum.

Stigaskor:
Sara Rún 19 stig(15 fráköst, 6 fiskaðar villur)
Þóra Kristín 6 stig (4 stoðsendingar)
Sandra Lind 5 stig (11 fráköst, 3 stoðsendingar)
Guðlaug Björt 4 stig
Sólrún Inga 3 stig
Guðbjörg 3 stig
Elsa Rún 2 stig
Bríet Sif 2 stig
Sólrún S með 1 stig

Þjálfarateymið ákvað að velja Elsu Rún sem mann leiksins en með hana innanborðs var íslenska liðið að vinna leikinn með 7 stigum og fékk hún fána frá enska körfuknattleikssambandinu í verðlaun.

Næsti leikur er á morgun á móti Sviss og hefst hann kl. 14:00 á íslenskum tíma. Þessi leikur er mikilvægur fyrir bæði lið þar sem þau eru bæð að leita að sínum fyrsta sigri í mótinu.