Stjórn Skallagríms í Borgarnesi hefur ákveðið að taka boði mótanefndar KKÍ um að fylla sæti Þórs Ak. úrvalsdeildinni á komandi keppnistímabili.

Stjórn Körfuknattleiksdeildar Skallagríms hefur sent frá sér eftirfarandi fréttatilkynningu:

Stjórn Körfuknattleiksdeildar Skallagríms harmar brotthvarf Þórs úr Úrvalsdeildinni í körfuknattleik og telur stöðu körfuknattleiks á Íslandi veikari eftir.

Gert hefur verið ráð fyrir því á undirbúningstímabili Skallagríms að leika í fyrstu deild og hefur allur undirbúningur liðsins og áætlanir miðað við það að leika fyrsta leik 4. október nk.

Það er hins vegar mat stjórnarinnar að Skallagrímur hafi fullt erindi meðal þeirra bestu og hefur stjórn Körfuknattleiksdeildar Skallagríms því á fundi sínum 26. september 2002 samþykkt að taka sæti Þórs frá Akureyri í úrvalsdeildinni í körfuknattleik þrátt fyrir skamman aðdraganda.

Ljóst er að við sæti Skallagríms í 1. deild verður ekki fyllt að sinni og leika því aðeins 9 félög í 1. deild á komandi keppnistímabili. KKÍ kannaði áhuga ÍA á að taka sætið, en ÍA taldi rétt að halda sig við það að leika í 2. deild í vetur.

Keppni í úrvaldsdeildinni hefst 10. október og í 1. deild karla 3. október. Endaleg niðurröðun leikja á komandi keppnistímabili verður gefin út síðar í dag.