Íslenska kvennalandsliðið byrjaði vel í Evrópukeppni smáþjóða í St. Pölten í Austurríki í dag þegar liðið vann 39 stiga sigur á Möltu, 85-46. Íslenska liðið stakk af í öðrum leikhlutanum og leit ekki til baka eftir það.

Ívar Ásgrímsson, þjálfari íslenska liðsins, leyfði öllum að spila og alls fékk liðið 44 stig frá bekknum í þessum leik, allar skoruðu og 9 af 12 leikmönnum Íslands voru með sex stig eða meira.

Helena Sverrisdóttir var stigahæst með 16 stig og 9 fráköst, Gunnhildur Gunnarsdóttir kom með 12 stig inn af bekknum og Pálína Gunnlaugsdóttir skoraði 10 stig. Hildur Sigurðardóttir skoraði öll 7 stig sín á upphafsmínútum leiksins þegar íslenska liðið komst í 14-5.

Ísland vann fyrsta leikhlutann 19-14 en sýndi fyrst yfirburði sína í öðrum leikhlutanum sem liðið vann 27-5. Eftir flotta frammistöðu íslenska liðsins í öðrum leikhlutanum voru úrslitin nánast ráðin og íslensku stelpurnar sigldu öruggum sigri heim.

Íslenska liðið fékk 44 stig frá bekknum í þessum leik og þar fóru fyrir liðinu þær Gunnhildur Gunnarsdóttir og Sigrún Ámundadóttir (frábær í öðrum leikhluta). Þær voru samt langt frá því að vera þær einu sem voru að koma sterkar inn og nýliðarnir Margrét Rósa Hálfdanardóttir og Marín Laufey Davíðsdóttir skoruðu sem dæmi báðar sex stig í sínum fyrsta mótsleik.

Maltneska liðið missti tvo byrjunarliðsleikmenn útaf meiddar í fyrri hálfleik og það var ekki til að bæta ástandið hjá liðinu. Það breytti því samt ekki að þær voru nokkrum númerum of litlar fyrir íslenska liðið í dag.

Næsti leikur íslenska liðsins er á móti Gíbraltar á morgun en hann hefst klukkan 12.00 að íslenskum tíma. Stelpurnar tryggja sér sigur í riðlinum með sigri.


Tölfræði íslenska liðsins:

Helena Sverrisdóttir - 16 stig og 9 fráköst
Gunnhildur Gunnarsdóttir - 12 stig á 16 mínútum
Pálína Gunnlaugsdóttir - 10 stig
Sigrún Ámundadóttir - 8 stig, 7 fráköst og 4 stolnir á 18 mínútum
Hildur Sigurðardóttir - 7 stig
Bryndís Guðmundsdóttir - 6 stig
Ragna Margrét Brynjarsdóttir - 6 stig
Marín Laufey Davíðsdóttir - 6 stig
Margrét Rósa Hálfdanardóttir - 6 stig
Kristrún Sigurjónsdóttir - 4 stig
Hildur Björg Kjartansdóttir - 2 stig
María Ben Erlingsdóttir - 2 stig