Ívar Ásgrímsson, þjálfari íslenska kvennalandsliðsins í körfubolta, á góðar minningar frá Evrópukeppni smáþjóða en undir hans stjórn vann íslenska liðið gull fyrir ártug.

Íslenska liðið er komið til Austurríkis þar sem liðið mætir Möltu í fyrsta leiknum í dag. Íslenska liðið stefnir á janfgóðan árangur og fyrir tíu árum.

Ívar fór þá með stelpurnar til Andorra þar sem íslenska liðið tryggði sér sigur á mótinu með 15 stiga sigri á Lúxemborg í úrslitaleiknum.

Hildur Sigurðardóttir er eini leikmaður íslenska liðsins í dag sem var einnig með fyrir tíu árum síðan. Hildur var öflug í úrslitaleiknum 31. júlí 2004 en hún var þá með 12 stig, 7 fráköst og 6 stoðsendingar.

Atkvæðamestu leikmenn íslenska liðsins fyrir tíu árum voru samt þær Birna Valgarðsdóttir (15,8 stig í leik), Signý Hermannsdóttir (13,6 stig, 7,0 fráköst og 3,0 varin skot í leik) og Anna María Sveinsdóttir (11,2 stig og 6,6 fráköst á 21,8 mínútum í leik).

Breiddin var styrkur íslenska liðsins fyrir tíu árum en fimm leikmenn voru með yfir tíu stig að meðaltali í leik og sjötti og sjöundi leikmaður skoruðu báðar meira en 7 stig að meðaltali í leik.

Íslenska liðið vann 4 af 5 leikjum sínum í Andorra árið 2004 en eini tapleikurinn á móti Aserbaídsjan kom sem betur fer ekki í veg fyrir að íslenska liðið komst í úrslitaleikinn. Þá átti aðeins efsta liðið í riðlinum möguleika á því að komast í úrslitaleikinn en að þessu sinni fara tvö efstu liðin í íslenska riðlinum í undanúrslit.

Hæsta sigurhlutfall þjálfara í Evrópukeppni smáþjóða:
Ívar Ásgrímsson 80 prósent (4 sigrar í 5 leikjum)
Sigurður Ingimundarson 78 prósent (7 sigrar í 9 leikjum)
Torfi Magnússon 47 prósent (7 sigrar í 15 leikjum)
Jón Kr. Gíslason 40 prósent (2 sigrar í 5 leikjum)