Nú rétt í þessu voru íslensku strákarnir að sigra Svíþjóð gula 72:60 eftir að hafa verið yfir í hálfleik 36:29. Leikið verður til úrslita gegn Svíþjóð bláum sem sigruðu Berlín í hinum undanúrslitaleiknum. Leikurinn er klukkan 13:00 að íslenskum tíma.

Fyrirfram var reiknað að Ísland myndi leika við Slóvaka sem voru besta annað sætið áður en Svíar gulir áttu leik við Skota eftir. Svíar þurftu að sigra með 42 stiga mun til að ná í undanúrslitin og gerðu þeir sér lítið fyrir og sigruðu Skotana með 50 stiga mun. Seinka varð því leiknum til kl. 17:45 að staðartíma.

Hákon og Helgi skoruðu fjögur fyrstu stigin og baráttan var til staðar hjá strákunum sem komust í 14:4 og leiddu 26:11 eftir fyrsta leikhluta. Sigmar Jóhann lék mjög vel og var ekki snemma í villuvandræðum þó svo að hann hafi náð í sínar fimm í lok leiksins. Svíar byrjuðu annan leikhluta mjög sterkt og þvinguðu strákanna í erfið skot. Svíar minnkuðu muninn í 26:20 en strákarnir héldu haus og svöruðu fyrir sig og leiddu 36:29 í hálfleik.

Í þriðja leikhluta setti Sigmar þrjár þriggja stiga körfur til að svara áhlaupi Svíana og sigruðu þeir leikhlutann 18:16 og leiddu 54:45 eftir þrjá leikhluta. Þorbjörn og Egill voru öflugir undir körfunni og allir leikmenn voru að leggja eitthvað til í púkkið.

Frábær byrjun íslensku strákanna í upphafi fjórða leikhluta kom þeim í 68:49 og útlitið mjög gott. Hápressa Svíana skilaði þeim 0-8 kafla sem þjálfarar stöðvuðu hið snarasta. Strákarnir leystu pressuna vel og lokuðu leiknum, lokatölur 72:60 í flottum baráttuleik og sæti í úrslitaleiknum staðreynd.

Stigaskor Íslands gegn Svíþjóð gulum:
Sigmar Bjarnason 21, Hákon Hjálmarsson 21, Egill Októsson 7, Davíð Magnússon 7, Helgi Guðjónsson 7, Stefán Ljubicic 4, Nökkvi Nökkvason 3, Gabríel Möller 2, Þorgeir Þorsteinsson 0, Þorbjörn Arnmundsson 0, Birkir Björnsson 0, Guðjón Sigurðarson 0