Íslenska U20 landsliðið beið í lægri hlut fyrir Danmörku í lokaleik liðsins á Norðurlandamótinu í Kisikallio í Finnland i dag. Ljóst var fyrir leik að með sigri ætti íslenska liðið möguleika á Norðurlandameistaratitilinum með hagstæðum úrslitum í leik Svía og Finna seinna um daginn. Dönum næði hins vegar sigur til að tryggja sér efsta sætið á mótinu.

Leikurinn hófst með flugeldasýningu íslenska liðsins sem komst í 14-4 eftir nokkra mínútna leik með fjórum þriggja stiga körfum. Danir létu það hinsvegar ekkert slá sig útaf laginu heldur söxuðu fljótt á íslenska liðið og náðu yfirhöndinni. Teigurinn reyndist okkar mönnum erfiður en Danir gerðu vel að sækja þar inn og áttu frákastabaráttuna skuldlaust.

Danir héldu yfirhöndinni út þriðja leikhlutann og fram eftir fjórða en með auknum hraða og baráttu náði íslenska liðið að koma sér aftur inní leikinn. Síðustu mínúturnar voru æsispennandi en stóru skotin vildu ekki ofaní hjá íslenska liðinu og endaði leikurinn með 70-67 sigri Dana sem tryggðu sér þar með sigur á mótinu.
Martin Hermannson var stigahæstur í liði Íslands með 26 stig en Matthías Orri spilaði vel með 14 stig.

Svíar unnu svo Finna í hörkuleik en með sigrinum var það ljóst að Danir enduðu fyrstir, Svíar í öðru, Ísland í þriðja og loks Finnar í því fjórða.