Tyrkneska körfuknattleikssambandið í samstarfi við FIBA hefur nú boðið hverju aðildarsambandi FIBA að senda tvo leikmenn sem eru fædd árið 2000 og einn efnilegan þjálfara með þeim í æfingabúðir sem fram fara í Istanbul í Tyrklandi í sumar um miðjan ágúst.

Tyrkneska sambandið hélt þessar búðir fyrir 4 árum, sem þá hétu Children of the World, og þá fóru fyrir Íslands hönd Bríet Hinriksdóttir, Keflavík og Högni Fjalarsson, KR, ásamt Örvari Þór Kristjánssyni þjálfara, og gáfu þau öll búðunum og upplifuninni einróma lof og hæstu einkunn.

KKÍ hefur ákveðið að þátttakendur í ár verði Birna V. Benónýsdóttir og Arnór Sveinsson frá Keflavík og Ingvar Þór Guðjónsson þjálfari frá Haukum.

Búðirnar standa yfir í viku, dagana 11.-17. ágúst og er allt innifalið í boði tyrkneska sambandsins.