Það var boðið uppá sannkallaða körfuboltaveislu í Laugardalshöllinni í kvöld þegar Búlgarar heimsóttu strákana okkar.

Það var mikið undir en þetta var úrslitaleikur fyrir bæði lið. Stemningin í Höllinni var góð og bæði lið sýndu góðan leik.

Ísland leiddi mest allan leikinn og í seinni hálfleik náðu Búlgarar að komast yfir og náðu smá forskoti. En strákarnir gáfust ekki upp og náðu að jafna og komast yfir. Lokamínútur leiksins voru magnaðar og við fengum frábært tækifæri til að jafna leikinn í blálokin en boltinn vildi ekki ofaní og Búlgarar unnu í mögnuðum leik.

Frammistaða liðsins var frábær í kvöld og áhorfendur létu sitt ekki eftir liggja og hvöttu strákana áfram.

Jón Arnór Stefánsson var stigahæstur í kvöld með heil 32 stig og 7 fráköst. Næst stigahæstur var Pavel Ermolinskij með 15 stig.

Tölfræði leiksins

Næsti leikur liðsins er á föstudag gegn Rúmeníu og hefst hann kl. 19.15 í Laugardalshöll.