Fyrsta verkefni „Svíþjóðardagsins“ í dag er hjá U16-drengjum í Solna Halllen, á heimavelli Solna Vikings, þar sem allir okkar leikir fara fram í dag.

Byrjunarlið Íslands: Kári, Kristinn, Hilmir, Halldór, Sæþór.

1. leikhluti
Strákarnir okkar byrja í pressu allan völlinn eftir skoraða körfu. Frábær byrjun hjá Sæþóri sem byrjaði sterkt, varði skot, stal tveim boltum í pressunni og skoraði 2 körfur í teignum á fyrstu þrem mínútum leiksins. Nákvæmlega það sem við þurfum að byrja sterkt líkt og í fyrstu leikjunum. Hilmir var einnig flottur, tók fráköst og setti tvo þrista í tveim skotum og var með 12 stig. Kári Jónsson var kominn með 6 fráköst, 4 stoðsendingar og 3 stig eftir leikhlutann.

Vörnin hjá okkar strákum góð og Svíar ekki að finna netið í skotunum sínum.
Staðan að loknum leikhlutans 26:14 fyrir Ísland.

2. leikhluti
Heimamenn komu betur stemmdir inn í annan leikhlutann og fóru að skora körfur á meðan ekkert gekk hjá okkur að hitta úr opnum skotum. Strákarnir spiluðu vel saman og fundu opnanir en ofaní vildi boltinn ekki fara.

Leikhlutinn fór 7:14 fyrir Svía og staðan 33:28 í hálfleik fyrir Ísland. Ljóst að okkar strákar eru með þetta í hendi sér og þyrftu bara að setja skotin sín. Ísland hafði góð tök á leiknum og stjórnaði ferðinni.

Stigahæstu menn í hléi voru Hilmar með 12 stig, Kristinn 7 stig og Kári 6 stig.

Seinni hálfleikur
3. leikhluti fór vel af stað hjá Íslandi og greinilegt að menn voru ekki sáttir með annan leikhlutann. Halldór kom sterkur inn af bekknum sem og aðrir sem á eftir fylgdu. Okkar strákar settu í lás í vörninni og fengu aðeins á sig 8 stig gegn 16 okkar stigum og munurinn orðin 23 stig fyrir lokaleikhlutann og við í bílstjórasætinu.

4. leikhluti
Hér var aldrei spurning hvert stefndi, okkar strákar héldu áfram að kafsigla svíann í sókn og spiluðu góða vörn. Munurinn kominn í 30 stig og Einar rúllaði inn leikmönnum af bekknum. Leikhlutinn fór 22:17 fyrir Ísland og lokatölur 81:53.

Sigahæstir í leiknum
Hilmir 16 stig og 6 fráköst, Kristinn 14 stig og 7 fráköst, Kári 11 stig, 9 fráköst og 5 stoðsendingar, Halldór 11 stig.

Niðurstaðan:
Með sigrinum er ljóst að það verður hreinn úrslitaleikur á morgun ÍSLAND-DANMÖRK um norðurlandameistartitilinn en bæði lið eru taplaus og mætast í lokaleik sínum á morgun. Glæislegt hjá okkar mönnum í U16 og ljóst að liðið er að spila feikivel saman á þessu móti.

Myndasafn úr leiknum

Myndasafn 2 úr leiknum

Tölfræði leiksins