KKÍ býður upp á dómaranámskeið á nýjan leik og aftur í fjarkennslu.

Nemendur skrá sig til KKÍ og fá sendan aðgang að námskeiðinu sem þeir geta unnið á sínum hraða þegar þeim hentar, hvar sem er á landinu.

Námskeiðinu lýkur svo á verklegu prófi í febrúar þar sem reynt verður að koma til móts við hvar þátttakendur búa.

Það er um að gera fyrir alla sem hafa áhuga á körfuknattleik að skrá sig og fá betri skilning á reglunum. Einnig geta þeir sem áhuga hafa farið að dæma leiki á vegum dómaranefndar KKÍ.

Hér má sjá hvað nokkrir þátttakendur á fyrsta námskeiðinu höfðu að segja.
„Mér fannst þessi fjarkennsla alveg frábær, verkefni og próf og annað lesefni vel uppsett, þetta hentaði mér mjög vel þar sem ég er mikið erlendis þá hafði ég þann möguleika að geta tekið þátt og leyst verkefni og próf hvar sem ég var í heiminum. Kennarar voru fljótir að svar spurningum um námsefnið. Þessi fjarkennsla er mjög vel heppnuð og ég mæli eindregið með þessu námskeiði.“ Albert Óskarsson - Keflavík

„Það var gaman að taka þátt í þessu námskeiði og það jók skilning minn á körfubolta enn frekar. Þetta var mikil vinna en það var gott að geta unnið í verkefninu þegar mér hentaði.
Ég mæli með því að sem flestir áhugamenn um körfubolta taki dómarapróf.“ Fríða Torfadóttir - ÍR

„Þetta fyrirkomulag var mjög sniðugt og skemmtilegt. Þetta var fróðlegt, skemmtilegt og krefjandi. Maður gat ekki tekið þetta á kæruleysinu þó maður kynni reglurnar fyrirfram (að manni fannst sjálfum). Ef maður hafði einhverjar spurningar eða eitthvað vafðist fyrir manni, þá var minnsta málið á henda því á spjallið eða senda kennara tölvupóst og maður fékk svar mjög fljótlega. Þannig að ég var og er mjög sáttur með þetta fyrirkomulag.“ Bjarki Kristjánsson - Kormákur

Skráningafrestur er til 11. janúar og er þátttökugjald 4000 kr. og skal það greiðast við skráningu.

Skráning fer fram í netfanginu kki@kki.is.

Eftirfarandi upplýsingar þurfa að koma fram við skráningu:
Nafn; kennitala; félag, heimilisfang, gsm-sími og staðfestingu á að þátttökugjald hafi verið greidd(kvittun úr heimabanka send á kki@kki.is) - reikn. 0121-26-1369 - kt. 710169-1369.