Ákveðið hefur verið að úrslit Lengjubikars karla munu fara fram í Stykkishólmi föstudaginn 23. og laugardaginn 24. nóvember næstkomandi.

Að venju verða undanúrslitin „Final-Four“ haldin á föstudegi og svo úrslitaleikurinn sjálfur háður á laugardeginum.

Leiktímar verða kl. 18.00 og 20.00 á föstudaginn og því kjörið tækifæri fyrir áhugasama að ná tveim leikjunum í einu í undanúrslitunum. Úrslitaleikurinn verður svo kl. 16.00 daginn eftir.

Nú er ein umferð eftir í riðlakeppni Lengjubikarsins í riðlunum fjórum. Efstu lið hvers riðils fara áfram í úrslitin og því spenna framundan í lokaumferðinni. Í raun verða þrír úrslitaleikir í umferðinni.

Grindavík og Keflavík leika hreinan úrslitaleik um efsta sæti A-riðils í lokaumferðinni. Sigurvegari þess leiks fer í undanúrslit.

Í B-riðli er Snæfell með einum sigurleik meira en KR. KFÍ fær Snæfell í heimsókn í lokaumferðinni og KR fær Hamar í heimsókn. Verði bæði lið jöfn á KR innbyrðis viðureignina á Snæfell.

Í C-riðli munu efstu tvö liðin Tindastóll og Stjarnan mætast í Garðabæ. Stjarnan þarf sigur til að jafna Tindastól að stigum. Fyrri leik liðanna lauk með 15 stiga sigri Tindastóls.

í D-riðli er Þór Þ. einum sigri á undan ÍR sem leika við Val á heimavelli en Þór Þ. fær Njarðvík í heimsókn. Þór Þ. á 11 stig á ÍR innbyrðis verði þau jöfn að stigum. Ef Njarðvík og ÍR vinna verða þrjú lið jöfn að stigum, Þór Þ., Njarðvík og ÍR. Ef Njarðvík vinnur með 25 stigum þá vinna þeir riðilinn. Ef Njarðvík vinnur með 9 stigum eða meira og ÍR tapar þá vinnur Njarðvík riðilinn.

Sigurvegarar A- og B-riðils mætast og C- og D-riðils í undanúrslitunum.