Í kvöld kl. 18.30 að íslenskum tíma eigast við Svartfjallaland og Ísland ytra.

Leikurinn er fjórði leikur liðanna í keppninni. Svartfjallaland býður frítt á leikinn og má því búast við dágóðum fjölda á leiknum, en sami háttur var á hjá Serbíu þegar þeir léku gegn Svartfjallalandi og þá mættu 18.000 manns á leikinn (sjá videó neðar).

Ísland hefur unnið Slóvakíu en tapað fyrir Ísrael og Serbíu. Svartfjallaland hafa unnið alla sína fyrstu þrjá leiki, gegn Ísrael, Eistlandi og nágrönnum sínum í Serbíu, þar sem þeir sigruðu með því að skora flautukörfu frá miðju.

Bein útsending á netinu og lifandi tölfræði í kvöld
Leikurinn er í lifandi tölfræði hér í FIBA Europe-glugganum á KKÍ.is og við höfum fréttir af því að hann verði sýndur á ríkissjónvarpsstöð Svartfjallalands og ætti að vera hægt að sjá hann á netinu á www.rtcg.me og efst fyrir miðri síðu stendur „Nacionalni javni servis" og þar undir er ljósblár tengill sem á stendur „TV UZIVO" sem opnar beina útsendingu t.d í VLC Player sjálfkrafa.

Eistland á mánudaginn
Næsti heimaleikur Íslands verður á mánudaginn kemur kl. 19.15 í Laugardalshöllinni. Miðasala er á www.midi.is en frábær mæting hefur verið á fyrstu tvo heimaleikina og frábær körfubolti leikinn í Höllinni. Við hvetjum alla til að fjölmenna og styðja við bakið á landsliðinu.