Þær fréttir voru að berast að íslenska ungmennalandsliðið undir stjórn Friðriks Inga Rúnarssonar landsliðsþjálfara, hafi sigrað lið Slóveníu í síðar leik sínum í dag með 69 stigum gegn 55. Í hálfeik var staðan 35 stig gegn 32 Íslandi í vil. Tapið fór illa í Slóvenana og áttu nokkrir leikmanna þeirra erfitt með að hemja tárin.
Stigahæstir í íslenska liðinu voru Logi Gunnarsson með 26 stig og Helgi Magnússon með 23 stig og 10 fráköst. Þorleifur Ólafsson gerði 11 stig og Jón Arnór Stefánsson gerði 10.
Íslenska liðið mætir Þjóðverjum í undanúrslitaleik á morgun kl. 17.45 að íslenskum tíma.

Þess má geta að íslenska liðinu var boðið í mótið vegna forfalla. Þegar liðið kom til Frakklands eftir mjög erfitt ferðalag, var það litið hornauga og þótti mönnum ekki mikið til koma að Íslandi hafi verið boðið, enda um mjög sterkt mót að ræða. Var ekki laust við að frönsku skipuleggendurnir hafi verið nokkuð stressaðir yfir því hvernig liðið myndi standa sig. Eftir leikina í dag eru "frönsku maddömmurnar" eins og Friðrik Ingi orðaði það, "himinlifandi yfir úrslitunum og dansa magadans a la Helgu Braga af ánægju með að hafa boðið Íslendingunum". Árangurinn hefur líka vakið athygli hinna þjóðanna og hafa bæði Þjóðverjar og Frakkar átt í viðræðum við íslensku fararstjórnina um hugsanlegt samstarf.