Nú hafa bæði U15 ára landslið Íslands lokið keppni í riðlakeppni á Copenhagen Invitational.

Drengjaliðið vann alla þrjá leiki sína örugglega og tryggði sér fyrsta sætið í riðlinum, og mæta Pólverjum í undanúrslitum mótsins síðar í dag. Stúlkurnar sigruðu einn af fjórum leikjum sínum og eru því í fjórða sæti riðilsins en þær mæta Hollendingum á morgun í leik um bronsið.

Strákarnir mættu fyrst Berlínarúrvali og höfðu öruggan 82-46 sigur. Kári Jónsson var stigahæstur með 23 stig og næstur honum kom Ragnar Helgi Friðriksson með 17 stig. Halldór Garðar Hermannsson gerði 15 stig, Kristinn Pálsson gerði 12 stig, Hilmir Kristjánsson 7, Adam Smári Ólafsson 3, Aron Snær Friðriksson 2 og Kristófer Rúnar Ólafsson 1.

Annar leikurinn var gegn úrvalsliði austurhluta Noregs og strákarnir höfðu mikla yfirburði í þeim leik og sigruðu 102-51. Kári Jónsson fór mikinn og gerði 40 stig og næstur honum var Kristinn Pálsson með 15 stig, Árni Elmar Hrafnsson gerði 10 stig, Halldór Garðar Hermannsson 9, Adam Smári Ólafsson 6, Aron Snær Friðriksson 5, Bergþór Ægir Ríkharðsson 5, Ragnar Helgi Friðriksson 4, Ragnar Jósef Ragnarsson 4, Aðalsteinn Már Pétursson 2, Hilmir Kristjánsson 2.

Í dag léku strákarnir svo lokaleikinn í riðlinum gegn landsliði Hollendinga. Fyrir leikinn var ljóst að mikið þurfti að gerast til þess að íslenska liðið yrði ekki efst í riðlinum og þeir Einar Árni og Finnur Freyr dreifðu spilatíma vel. Hilmir Kristjánsson hefur verið að glíma við meiðsli aftan í læri síðustu vikur svo hann var hvíldur í þessum leik, en ljóst er að strákarnir mæta Pólverjum í undanúrslitum en þeir eru mjög sterkir.
Stigaskor Íslands: Kári Jónsson 20, Kristinn Pálsson 14, Kristófer Rúnar Ólafsson 11, Ragnar Helgi Friðriksson 6, Halldór Garðar Hermannsson 5, Aðalsteinn Pétursson 3, Adam Smári Ólafsson 3, Ragnar Jósef Ragnarsson 2.

Leikurinn gegn Pólverjum er klukkan 15:45 að íslenskum tíma og í hinum undanúrslitunum mætast Danir og Berlínarúrvalið. Strákarnir leika svo um sæti klukkan 13:45 að íslenskum tíma, en bæði bronsleikur og úrslitaleikur fara fram þá.

Stúlknaliðið lék fjóra leiki í riðlinum og höfðu þar einn sigur, gegn Englendingum. Þær leika um bronsið gegn Hollendingum á morgun og sá leikur fer fram klukkan 9:15 að íslenskum tíma.
Fyrsti leikur liðsins var einmitt gegn Hollendingum. Þrátt fyrir góða spretti þá náðu stelpurnar ekki að vinna sigur og lokatölur urðu 42-48. Stigaskor Íslands: Ingibjörg Sigurðardóttir 19, Dagný Davíðsdóttir 7, Eva Kristjánsdóttir 5, Þuríður Birna Björnsdóttir 4, Laufey Harðardóttir 3 stig, Elfa Falsdóttir 2 stig, Kristrún Björgvinsdóttir 2.

Annar leikurinn í gær var gegn Berlínarúrvalinu. Stelpurnar leiddu nánast allan leikinn en á síðustu tveimur mínútum leiksins reyndust þær þýsku sterkari og tryggðu sér 66-70 sigur. Stigaskor Íslands: Dagný Davíðsdóttir 20, Ingibjörg Sigurðardóttir 14, Þóra Jónsdóttir 13, Írena Sól Jónsdóttir 8, Kristrún Björgvinsdóttir 6, Elfa Falsdóttir 3, Þuríður Birna Björnsdóttir 2.

Stelpurnar hófu svo leik snemma í morgun en þá mættu þær Englendingum. Stelpurnar spiluðu mjög vel og tryggðu sér 63-52 sigur og voru þar með öruggar um allavega bronsleikinn. Stigaskor Íslands: Ingibjörg Sigurðardóttir 26, Eva Kristjánsdóttir 14, Dagný Davíðsdóttir 5, Thelma Ágústsdóttir 4, Kristrún Björgvinsdóttir 3, Laufey Harðardóttir 3, Þóra Jónsdóttir 2, Elfa Falsdóttir 2, Írena Sól Jónsdóttir 2, Þuríður Birna Björnsdóttir 2 stig.

Lokaleikurinn í riðlinum var svo að klárast rétt í þessu en þá léku stelpurnar við Dani. Með sigri hefðu þær hugsanlega átt möguleika á að komast í úrslitaleikinn en þrátt fyrir mikla baráttu og mjög góðan leik heilt yfir þá reyndust heimamenn sterkari á lokasprettinum. Lokatölur 50-64 sem gefur ekki rétta mynd af leiknum en munurinn á liðunum var lengstum þetta 4 til 6 stig. Stigaskor Íslands: Ingibjörg Sigurðardóttir 18, Eva Kristjánsdóttir 12, Dagný Davíðsdóttir 7, Elfa Falsdóttir 4, Kristrún Björgvinsdóttir 3, Þóra Jónsdóttir 3, Thelma Ágústsdóttir 2, Írena Sól Jónsdóttir 1 stig.

Heimasíðan stefnir á að flytja frétt af undanúrslitaleik U15 drengja í kvöld og að sjálfsögðu af niðurstöðu leikja morgundagsins eins fljótt og auðið er á morgun.

Íslenski hópurinn sendir góðar kveðjur heim.