Ólafur Rafnsson var endurkjörinn sem formaður KKÍ til næstu tveggja ára á 42. ársþingi sambandsins sem haldið var á Sauðárkróki um helgina.

Þá var Halldór Halldórsson kjörinn í stjórn sambandsins og þeir Gísli Georgsson og Sturla Jónsson voru endurkjörnir í stjórnina.

Magnús Svavarsson gekk úr stjórn, en tók þess í stað sæti í varastjórn, ásamt Gísla Friðjónssyni sem endurkjörinn var í varastjórnina. Jón Halldórsson var kjörinn nýr inn í varastjórnina og verður hann fyrsti varamaður og mun sem slíkur taka virkan þátt í stjórn sambandsins.

Fjölmargar tillögur lágu fyrir þinginu, en engar veigamiklar breytingar voru gerðar á keppnisfyrirkomulagi í efstu deild karla. Skipuð var þriggja manna nefnd til að vinna að áfram að þeim málum og þeim hugmyndum sem fram hafa komið um svokallaða „Superdeild“. Þá var tillaga um launaþak felld, en ekki þótt rétt að samþykkja það, né fækkun í úrvalsdeild á meðan vinna við nýja og breytta úrvalsdeild/superdeild er enn í gangi.

Ákveðið var að breyta reglum um tekjuskiptingu í oddaleikjum í þá veru að heimalið hirði allan hagnað og beri allan kostnað af slíkum leikjum, en áður var um skiptingu milli liða að ræða í oddaleikjum.

Einnig var samþykkt tillaga um breytingu á reglugerð fyrir erlenda leikmenn. Hún er í þá veru að félögum er óheimilt að fé sér nýja erlenda leikmenn eftir 5. janúar ár hver, nema annar erlendur leikmaður hafi leikið fyrir liðið fyrr á sömu leiktíð.

Helstu mál sem snerta keppni í yngri flokkum voru þau að samþykkt var að drengjaflokkur hætti að leika í fjölliðamótum og leiki þess í stað með deildarfyrirkomulagi heima og heiman og KKÍ raði að minnsta kosti einum dómara á þá leiki. Þá var 4. umferð Íslandsmóts yngri flokkanna í B, C og D-riðlum felld út og sérstök vormót ákveðin í þeirra stað. Einnig var ákveðið að skráning yngri flokka í mót á vegum KKÍ fari fram á haustin í stað vorsins eins og er um meistaraflokka og þá flokka sem leika í deildarfyrirkomulagi.

Samþykktar voru ályktanir á þinginu í þá veru að deildarleikir í efstu deildum karla og kvenna verði á fimmtudögum og föstudögum og leikir hefjist almennt kl. 19.15.