Fimmtudaginn 23.febrúar kom upp mál innan Körfuknattleikshreyfingarinnar sem varðar tvo dómara.

Stjórn KKÍ og dómaranefnd hafa ályktað og gefið út yfirlýsingu vegna málsins og nú síðast viðkomandi dómarar.

Stjórn og dómaranefnd telur málið alvarlegt og óheppilegt í alla staði og gæti verið til þess fallið að minnka tiltrú innan körfuknattleikshreyfingarinnar á störf dómara.

Stjórn KKÍ og dómaranefnd hafa farið ofan í saumana á þessu máli með það fyrir augum að draga staðreyndir málsins fram. Dómurunum sem hér um ræðir verður að virða það til hróss að þeir hafa verið samstarfsfúsir og ekki reynt að draga fjöður yfir þau mistök sem þeir hafa gert. Einnig er þeim ljóst að svona mistök eru alvarleg og að nauðsynlegt er að bregðast við enda liggja sameiginlegir hagsmunir í því að viðhalda trúverðugleika hreyfingarinnar.

Dómaranefnd í samráði við stjórn KKÍ hefur í þessu ljósi tekið þá ákvörðun að dómararnir tveir sem um ræðir munu ekki dæma fleiri leiki á vegum KKÍ á þessu keppnistímabili.

f.h.stjórnar og dómaranefndar,
Hannes S. Jónsson formaður KKÍ
Pétur Hrafn Sigurðsson formaður dómaranefndar KKÍ