Í dag tók aga- og úrskurðanefnd fyrir kæru sem barst of seint frá Karli Friðrikssyni dómara eftir leik Fjölnis og KFÍ í undanúrslitum bikarkeppni unglingaflokks karla sem fór fram síðastliðinn laugardag.

Málið er allsérstakt og verður reynt að útskýra það í stuttri yfirlýsingu og samantekt hér að neðan.

Karl Friðriksson dómari fékk símtal eftir umræddan leik frá Ágústi Jenssyni, dómara, sem dæmir fyrir Fjölni. Í kjölfar þess tók Karl þá undarlegu ákvörðun að skila inn kærunni vísvitandi of seint. Þar með myndi aga- og úrskurðarnefnd ekki getað tekið hana fyrir á réttum tíma svo að umræddur leikmaður yrði mögulega ekki í leikbanni í úrslitaleiknum sem fram fer á morgun laugardag.

Í ljósa aðstæðna tók aga- og úrskurðarnefnd málið fyrir í dag á aukafundi nefndarinnar og úrskurðaði í málinu.

Stjórn og dómaranefnd KKÍ líta þetta mál mjög alvarlegum augum og hafa þeir Karl og Ágúst verið teknir af niðurröðun dómaranefndar tímabundið.


Fyrir hönd stjórnar og dómaranefndar KKÍ,

Hannes S. Jónsson
formaður KKÍ