Skotbakvörðurinn Robert Jarvis er genginn til liðs við ÍR á nýjan leik, en hann lék með þeim síðustu sex deildarleikina tímabilið 2009-2010. Því ekki úr vegi að rifja upp flautukörfu sem hann átti í einum leiknum það árið.

Hann átti stóran þátt í velgengni þeirra bláu á lokasprettinu en einn mikilvægasti sigur þeirra kom á útivelli gegn Fjölni með meðfylgjandi „Buzzer“.

ÍR-ingar áttu boltann þegar 13.5 sek. voru eftir af leiknum og þeir voru 4 stigum undir. Robert skoraði þrist og ÍR-ingar brutu strax á eftir til að stöðva tímann. Þar sem Fjölnir var komið í bónusskotrétt fengu þeir dæmt víti og skoruðu þeir úr fyrra skoti sínu, ÍR náði frákastinu eftir það seinna og brunuðu fram völinn þar sem Robert setti niður annan þrist langt utan af velli á þessum tíma sem eftir var og ÍR sigraði í leiknum á ævintýralegan hátt.

Þetta varð svo til þess á endanum að ÍR hafnaði í 8. sæti og voru stigin fyrir sigurinn í þessum leik mikilvæg til að forðast fallbaráttuna en setti á sama skapi stein í götu Fjölnismanna því þeir enduðu í 9. sæti og misstu þar með af sæti í úrslitakeppninni það árið.



Myndband: Karl West Karlsson

Gunnar Sverrisson, þjálfari ÍR, segir frá hans upplifun á leiknum:

Mannstu aðdragandann?
Hann var búinn að skora eina ansi "djúpa" rétt áður - þegar það gerðist þá trúði ég að við ættum aðra inni - það var frábært skot, en sú sem kom síðar var svakaleg...

Hvað flaug í gegnum hugann þegar skotið fór í loftið?
Það eina sem ég hugsaði var afar einfalt - eigum við ekki eitt svona inni eftir bras vetrarins - man líka að ég hugsaði þegar Rob var með boltann, af hverju gefur hann ekki á Steinar Arason sem var algjörlega einn á hægri kanti - en ég var fljótur að gleyma því, þetta er mjög eftirminnilegt og enn og aftur var ég minntur á „löng" hver sekúnda er í körfubolta.

Hvað gerðist eftir á?
Liðið gjörsamlega trylltist og mér var litið að varamannabekk Fjölnis - þar stóðu menn agndofa enda voru þessar síðustu sekúndur leiksins hreint ótrúlegar - þeirra hlutskipti var annað en okkar.

Fyrri flautukörfur:
Jakob Örn gegn Georgíu.
Pálmar gegn Noregi.
Jón Arnór gegn Keflavík.