Ísland leikur við Danmörku í kvöld á Norðurlandamótinu sem fram fer í Sundsvall þessa dagana.

Leikurinn hefst klukkan 18:15 að íslenskum tíma.

Við þurfum að spila betur en við gerðum gegn Finnum og þá sérstaklega varnarlega ef við ætlum að vinna Danina sem oft hafa gert okkur lífið leitt.

Leikmenn og þjálfarar voru ekki ánægðir með varnarleikinn gegn Finnlandi og eru ákveðnir í að gera betur gegn Dönum.

Vangaveltur eftir fyrstu tvo leikina á Norðurlandamótinu:

Eru það vonbrigði að hafa tapað fyrstu tveimur leikjunum á mótinu gegn Svíþjóð og Finnlandi?

Við fundum fyrir eftirvæntingu fyrir mótinu sem er gott, það er jákvætt ef fólk heima hefur áhuga á verkefnum landsliðanna okkar og enn jákvæðara ef því er ekki sama og gerir jafnvel kröfur á að landsliðin okkar vinni þá leiki sem liðið fer í. Ef ekki eru gerðar neinar kröfur þá er hætta á að menn sofni á verðinum.

Það var ýmislegt sem hjálpaðist að við þennan áhuga og þær væntingar sem fólk gerði til liðsins, nýr erlendur þjálfari var ráðinn sl. vor, allir okkar bestu leikmenn gáfu kost á sér í verkefnið, það fjölgar jafnt og þétt í hópi atvinnumanna sem og leikmanna sem eru að gera það gott í háskólaboltanum og áfram mætti telja.

Við munum eignast betri landslið þegar við eignumst fleiri atvinnumenn. Við munum eignast betri landslið þegar leikmenn okkar æfa meira, betur og markvissara. Við munum eignast betri landslið þegar við eignumst fleiri hávaxna leikmenn sem fá þá kennslu og þolinmæði sem þarf.

Að þessu kemur öll hreyfingin, við þurfum öll, sama hvar við erum að leggjast á eitt til þess að ná lengra.

Sagan gegn Svíþjóð og Finnlandi:

Hafa verður í huga að við höfum einungis einu sinni í sögu A-landsliðs karla unnið Svíþjóð og Finna tvisvar svo fyrirfram var varla hægt að ganga að því vísu að við myndum sigra þessar þjóðir þó stefnan væri auðvitað að sigra alla okkar andstæðinga.

Þetta breytir ekki því að við hefðum svo sannarlega getað unnið heimamenn í fyrsta leik og sýndi liðið það í fyrri hálfleik með ágætis leik. Í þeim seinni þegar Svíar náðu smátt og smátt yfirhöndinni þá missti liðið sjálfstraustið og vantaði kraft og neista í leikmenn til að vinna Svíana.

Vissulega hafði það einhver áhrif á hópinn þegar Jón Arnór meiddist þar sem í fyrstu virtist að um alvarleg meiðsli gæti verið að ræða. Það er auðvitað sárt að loksins þegar landsliðið kemur saman og allir okkar bestu leikmenn með að lykilmaður eins og Jón Arnór detti út á fyrstu andartökum í fyrsta leik mótsins. Svona er lífið, það er ekki alltaf á vísan að róa og það er ekkert annað í stöðunni en að halda áfram og eflast.

Af Jóni er það að frétta að meiðslin eru ekki alvarleg en hann nær samt ekki að spila meira á mótinu. Hann verður kominn á fullt eftir 7-10 daga.

Finnland VS Ísland:

Hvar er okkar lið statt í samanburði við Finnland?

Það verður að segjast eins og er að finnska liðið er talsvert á undan okkur þegar kemur að getu sem lið og einnig hafa þeir enfaldlega meiri breidd en við.

Finnland hefur á síðustu 2-3 árum verið að vinna þjóðir eins og Serbíu, Frakkland og Ítalíu ásamt öðrum stórum þjóðum og eiga góða möguleika á að komast í lokakeppni Evrópukeppninnar sem fram fer í Litháen 31. ágúst - 18. september nk. Það yrði þá í fyrsta skipti síðan 1995 sem Finnland kæmist í lokakeppni Evrópukeppninnar.

Það landslið sem Finnar eru með í dag er með því allra sterkasta sem þeir hafa átt í sögu finnsks körfubolta og undirstrika frábær úrslit þeirra gegn risakörfuboltaþjóðum það með afgerandi hætti.

Á þessum tímapunkti þar sem við erum með okkar A-landslið sem hefur ekki spilað leik síðan í september 2009 þá er ekki hægt að bera þessi lið saman með sanngjörnum hætti. Munurinn á þessum liðum er einfaldlega það mikill. Það breytir hins vegar ekki því að liðið getur gert betur en það gerði í leiknum við Finna og voru sumir leikmenn í liðinu að leika undir getu en það kemur með fleiri leikjum og verkefnum.

Norðurlandamót eru á fjögurra ára fresti hjá A-landsliðum karla og kvenna og þar sem A-landsliðið hefur ekki leikið í á annað ár þá verður að líta á þetta Norðurlandamót sem upphafspunkt í augnablikinu en ekki endapunkt. Ef lokatakmark í þessari lotu hefði verið að vinna þetta mót þá hefði undirbúningurinn verið með öðrum hætti, liðið hefði þá þurft að spila nokkra æfingaleiki svo dæmi sé tekið.

Liðið fær svo tvo leiki við Kína í september sem verður að teljast afar jákvætt því bæði er Kína með gott lið og svo er það mikið ævintýri að fara til Kína sem ætti að gera liðinu kleift að halda áfram þeirri vinnu að slípast saman.

Meira síðar um A-landsliðin okkar og almennt um afreksstarfið.