Íslenska U-20 ára liðið tapaði gegn Ísrael í jöfnum og spennandi leik fyrr í kvöld 73:78.

Eftir erfiðar fyrstu mínútur tóku strákarnir frumkvæðið í leiknum og leiddu mestan hluta fyrri hálfleiks en andstæðingurinn náði að komast einu stigi yfir fyrir hlé 40:39.

Ísland leiddi seinni hálfleikinn meira og minna og þegar nokkrar mínútur voru eftir var staðan 67:63 og við með boltann og tækifæri á að komast í góða stöðu. Ekki gekk okkur að klára sóknir vel á þessum tímapunkti og náðu Ísraelar að jafna og komast yfir. Eftir það vorum við að elta og þrátt fyrir að eiga möguleika í lokin að jafna eða komast yfir þá tókst það ekki og Ísrael hafði betur með því að skora úr vítunum sínum.

Svekkjandi staða að vera með tvo tapleiki gegn sterkum körfuboltaþjóðum sem við hefðum svo sannarlega geta unnið en það þýðir ekkert að súta það, nú er bara að safna kröftum fyrir næsta leik gegn Belgum á sunnudag en liðið á frí á morgun.

Tómas Tómasson var besti maður vallarins en kappinn skoraði 26 stig og lét mikið að sér kveða. Ægir Þór átti einnig flottan leik en hann var með 19 stig, 5 stoðsendingar og 5 fráköst. Haukur Helgi gerði 14 stig og tók 13 fráköst.

Ragnar Nathanaelsson lét finna vel fyrir sér í vörninni en hann var með 6 varin skot auk 6 stiga og 5 frákasta. Þá eru ótalin öll skot andstæðingana sem hann breytir með sinni ógn.

Lokatölur leiksins voru 73:78

Næsti leikur er gegn Belgum á sunnudag. Þess má geta að Belgar voru rétt í þessu að vinna heimamenn með 19 stigum svo það er ljóst að Belgar eru sterkir.