Stúdínur urðu í kvöld deildarmeistarar í fyrsta sinn í sögu félagsins þegar þær unnu KR 65-63 í lokaleik liðanna í deildinni. Þetta var fyrsti stóri titilinn sem ÍS vinnur frá því að liðið varð Íslands- og bikarmeistari veturinn 1990 til 1991 en frá því að úrslitakeppnin fór af stað 1993 hefur ÍS aldrei náð besta árangrinum yfir veturinn. Aðeins einn leikmaður ÍS-liðsins frá 1991 er enn að spila, Hafdís Helgadóttir og hún tók einmitt við deildarmeistarartitlnum sem fyrirliði ÍS.
Meadow Overstreet lék sinn fyrsta leik með ÍS og skoraði 21 stig og gaf 5 stoðsendingar en Alda Leif Jónsdóttir skoraði 17 stig, tók 9 fráköst, stal 6 boltum og varði fjögur skot. Hjá KR gerðu þær Helga Þorvaldsdóttir og Carrie Coffman báðar 19 stig.