Guðmundur er hér fyrir miðju í treyju númer 22

Guðmundur Þorsteinsson eða Immi eins og hann var ávallt kallaður lést nú um helgina 68 ára að aldri.

Það má segja að Immi hafi komið að starfsemi KKÍ frá stofnun sambandsins og allt þar til hann lést.

Hann spilaði sinn fyrsta landsleik á stofnári KKÍ árið 1961, var landsliðþjálfari á sjöunda og áttunda áratugnum og hann tók fyrst sæti í stjórn KKÍ 1968 og sat í stjórn með hléum til ársins 1994.

Allt til síðasta dags var Immi boðinn og búinn til að koma að málum til að efla körfuboltann í landinu ef þörf væri og meðal annars kom hann að undirbúningi 50 ára afmælis KKÍ sem verður 29. janúar næstkomandi.

Fyrir hönd stjórnar og starfsmanna KKÍ sendi ég eftirlifandi eiginkonu hans, börnum og barnabörnum innilegar samúðarkveðjur og þakka um leið fyrir allt það sem Immi gerði fyrir íslenskan körfubolta.

Hannes S. Jónsson
Formaður KKÍ