Fjórar vikur nú í úrslitakeppni A-liða í 2. deild karla, en hún verður haldin í Grafarvogi í Reykjavík dagana 22.-24. mars nk. Línur eru farnar að skýrast hvaða lið munu komast í úrslit, en í ár verða úrslitakeppninnar þrjár vegna hins nýja fyrirkomulags í deildinni.

Mótanefnd hefur ákveðið fyrirkomulag keppnanna og hvernig lið verða valin í úrslitakeppnina. Í keppni A-liða, þar sem leikið er um tvö laus sæti í 1. deild að ári, verður keppnisfyrirkomulagið með svipuðu sniði og undanfarin ár. Þó hefur verið gerð sú breyting að eftir riðlakeppnina mun tvö efstu liðin í hvorum riðli leika í kross til undanúrslita og síðan verður leikið um sæti.

Úr A-1 fer eitt félag í úrslitakeppnina (væntanlega HK) og einnig fer eitt félag úr A-2 (líklega ÍV). Úr A-3 fara tvö félög í úrslit (Fjölnir og UMFH). Eitt félag kemst í úrslit úr A-4 (Grundarfjörður) og einnig kemst eitt félag úr A-5 (Reynir Hnífsdal) í úrslitakeppnina. Úr A-6 munu tvö félög fara í úrslit (Höttur og Skotfélag Ak. eða Smári).

Í úrslitakeppninni verður liðunum raðað í tvo riðla og allir leika við alla á föstudegi og laugardegi. Fyrir hádegi á sunnudegi verða undanúrslit og einnig leikirnir um 7. sætið og 5. sætið. Eftir hádegi verður leikið um 3. sætið og endað verður á úrslitaleik deildarinnar. Leikið verður í Íþróttamiðstöðinni v/Dalhús og íþróttahúsi Rimaskóla.

Úrslitakeppni B-liða og C-liða verður með svipuðu sniði og úrslitakeppni unglingaflokks karla hefur verið undanfarin ár. Í B-liða keppninni komast tvö efstu liðin í A-1 (KR, UMFG) A-2 (Haukar, UMFN) og A-3 (Keflavík, Stjarnan) í úrslit ásamt KFÍ úr A-5. Áttunda lið í úrslitakeppnina verður það lið sem hefur bestan árangur í þriðja sæti B-liða í sínum riðli (A-1 eða A-2).

Þau fjögur lið sem verða efst B-liða í sínum riðli fá heimaleik í 8-liða úrslitum þar sem leikinn verður einn leikur um sæti í í undanúrslitum. Þar fá þau lið heimaleik sem fæstum leikjum töpuðu í heild í deildinni í vetur. Úrslitaleikurinn verður síðan á hlutlausum velli í apríl.

Þetta fyrirkomulag verður einnig viðhaft í úrslitakeppni C-liða. Í úrslit þar komast efstu liðin í hverjum riðli sem í dag eru Reynir S., Keflavík, Valur, Skallagrímur, KFÍ, Tindastóll og Hamar. Áttunda lið í úrslitakeppni C-liða verður það félag sem bestan árangur hefur í örðu sæti C-liða í sínum riðli.

Úrslitakeppnir B og C-liða verða leiknar á tímabilinu 20. mars - 14. apríl eða því sem næst.