KKÍ hefur í dágóðan tíma verið á samskiptavefnum facebook.com og þannig nýtt sér tæknina við að komast í samband við aðdáendur íslenska körfuboltans og sett inn tilkynningar og fréttir á síðuna.

Nú á dögunum var það hin 17 ára Stefanía María Kristinsdóttir sem varð vinur KKÍ númer 2000.

Að því tilefni var ákveðið að gefa henni smá glaðning og varð fyrir valinu hin forláta Jordan bók sem kom út fyrir nokkrum árum, Powerade-landsliðsbrúsi og treyja frá Jóni Arnóri frá því þegar hann lék með Roma á Ítalíu.

Stefánía er dyggur stuðningsmaður Stjörnunnar og starfar á heimaleikjum liðsins í miðasölu og sjoppu og bræður hennar tveir æfa með Stjörnunni. Á myndinni tekur hún við gjöfunum ásamt yngri bróður sínum, Ólafi Áka Kristinssyni 8 ára, sem hefur æft frá fjögurra ára aldri í minniboltanum og var hann hæstánægður með systur sína og gjafirnar.

KKÍ stefnir svo á að veita vini númer 3000 skemmtilegan glaðning þegar sá tími kemur.