Á fjögurra ára fresti er haldið heimsþing FIBA þar sem öll aðildarfélög allra heimsálfanna fimm funda og er það haldið samhliða Heimsmeistaramótinu hverju sinni.

Í dag hefst þingið í Istanbul og eru yfir 170 lönd af þeim 213 sem eru í FIBA sem senda fulltrúa á þingið. Um 400 einstaklingar sækja þingið, þar með taldir fulltrúar KKÍ þeir Hannes Jónsson formaður og Friðrik Ingi Rúnarsson framkvæmdastjóri. Ólafur Rafnsson sækir einnig þingið sem forseti FIBA Europe.

Á hverjum degi er gefið út fréttabréf þingsins sem inniheldur ýmsar fróðlegar greinar og uppýsingar og er hægt að kíkja á fyrsta tölublaðið hérna en þar er meðal annars viðtal við Hannes um stöðu íslensk körfubolta og viðtal við Ólaf Rafnsson, forseta FIBA Europe, sem fjallar um EM í Litháen á næsta ári.