Njarðvíkurstúlkur tryggðu sér í kvöld sæti í bikarúrslitaleik kvenna þar sem þær mæta KR 9. febrúar næstkomandi. Njarðvík vann Hauka 67-56 á heimavelli sínum í Njarðvík en KR komst í bikarúrslitaleikinn á mánudag með 44-55 sigri á ÍS. Þetta er í þriðja sinn frá upphafi sem Njarðvík kemst í bikarúrslitin en kvennalið félagsins hefur aldrei orðið bikarmeistari, tapaði fyrir KR 1983 og Keflavík 1996. KR-stúlkur sem eru núverandi bikarmeistarar hafa komist fimm sinnum í bikarúrslitaleikinn á síðustu átta árum og verður þetta í 14. sinn sem KR-konur leika um bikarinn en þær hafa átta sinnum fagnað sigri. Kvennalið Njarðvíkur varð einnig síðasta liðið til að tryggja sig inn í Höllina en með því er ljóst að KR og Njarðvík heyja tvöfalt einvígi í Höllinni 9. febrúar því bæði karla- og kvennalið félaganna munu þá keppa um bikarinn.