Í nótt réðst það á heimavelli Phoenix Suns að það verða stórveldin LA Lakers og Boston Celtics sem munu mætast í úrslitum NBA-deildarinnar í ár.

Lakers vann Phoenix í leik liðanna í nótt og þar með einvígið 4-2. Boston sigraði Orlando einnig 4-2 í úrslitum austurstrandarinnar.

Þetta verður í 12. sinn sem Lakers og Boston mætast í úrslitum deildarinnar en þessi lið eru langsigursælustu liðin í sögu hennar. Boston er með 17 titla og Lakers 15 og er núverandi meistari. Saman eiga liðin 33 titla af 64 í sögu deildarinnar.

Þess er skemmst að minnast að Boston sigraði Lakers í úrslitunum fyrir tveimur árum en nú verður nýr kafli skrifaður í baráttunni milli þessara liða.

Fyrsti leikur liðanna fer fram á aðfaranótt föstudagins 4. júní í Los Angeles. Leikurinn hefst kl. 21.00 á austurstrandatíma fimmtudaginn 3. júní sem þýðir að hann hefst um kl. 01.00 eftir miðnætti að íslenskum tíma en munur á Íslandi og austurströnd eru fjórar klukkustundir. Allar tímasetningar á NBA síðum miðast við austurstrandatíma.

Allir leikirnir í lokaúrslitunum verða sýndir beint á Stöð 2 Sport.

Leikjaplan úrslitanna: (dags. og tímar miðað við íslenskan tíma)
Leikur 1: 3. júní - fimmtudagur í LA kl. 01.00
Leikur 2: 6. júní - sunnudagur í LA kl. 00.00
Leikur 3: 8. júní - þriðjudagur í Boston kl. 01.00
Leikur 4: 10. júní - fimmtudagur í Boston kl. 01.00

Leikur 5: 13. júní - sunnudagur í Boston kl. 00.00
Leikur 6: 15. júní - þriðjudagur í LA kl. 01.00
Leikur 7: 17. júní - fimmtudagur í LA kl. 01.00