Stelpurnar í U16 léku fyrsta leik sinn á NM í ár gegn Norðmönnum eins og strákarnir í morgun. Lokatölur 59:76.

Norðmenn höfðu frumkvæðið í leiknum en Íslendingar áttu nokkrar góðar rispur sem dugðu þó aldrei til þess að brjóta ísinn. Margrét Rósa Hálfdánardóttir var atkvæðamest í íslenska liðinu með 17 stig og 4 fráköst.

Norðmenn byrjuðu vel og komust í 0-8 áður en Margrét Rósa Hálfdánardóttir kom Íslandi á blað. Aníta Eva Viðarsdóttir minnkaði síðan muninn í 7-10 með þriggja stiga körfu en Norðmenn pressuðu og léku ágenga vörn og íslensku bakverðirnir fóru á köflum óvarlega með boltann. Framan af fyrsta leikhluta höfðu Norðmenn haft yfirburði í teignum en Lovísa Björt Henningsdóttir og Hildur Björg Kjartansdóttir breyttu upp ermar og fóru að láta finna fyrir sér. Norðmenn leiddu samt 16-21 að loknum fyrsta leikhluta.



Margrét Rósa minnkaði muninn í 22-23 með þriggja stiga skoti sem skoppaði nokkrum sinnum á hringnum áður en boltinn ákvað að detta í netið. Íslenska liðið beitti svæðispressu eftir skoraðar körfur og féllu svo niður í svæðisvörn en stelpurnar voru full ákafar og fengu töluvert af villum dæmt á sig fyrir að reyna að stela boltanum. Jón Halldór Eðvaldsson þjálfari liðsins var ekki sáttur við þessar aðferðir sinna leikmanna enda leiddu Norðmenn 31-43 í hálfleik.

Jón Halldór messaði yfir sínum söfnuði í leikhléi og lagði ofurkapp á vörnina og að íslenska liðið ætti ekki sífellt að reyna að stela boltanum heldur halda sínum sóknarmanni fyrir framan sig. Margrét Rósa Hálfdánardóttir var atkvæðamest hjá Íslandi í hálfleik með 11 stig og 3 fráköst.

Ræðan hjá Jóni þjálfara í hálfleik náði greinilega að setja vind í íslensku seglin því Ísland byrjaði 8-2 og varnarleikurinn batnaði til mikilla muna. Þriðji leikhluti varð fyrir vikið jafn og skemmtilegur og á lokasprettinum hrundu inn þristar hjá liðunum þar sem Norðmenn áttu þann síðasta rétt fyrir lokaflautið og því leiddu þær norsku 54-55 fyrir fjórða og síðasta leikhluta en Íslendingar unnu leikhlutann 23-12 með sterkum varnarleik.



Norðmenn mættu einbeittir inn í fjórða leikhluta og skoruðu fjögur fyrstu stigin og tæpar fimm mínútur liðu áður en íslenska liðið komst á blað og þá var staðan orðin 56-64. Íslensku vörninni reyndist það svo dýrkeypt í fjórða leikhluta í dag að ögra ekki nægilega vel þriggja stiga skotum Norðmanna sem flest hver rötuðu rétta leið. Íslandi hafði misst andstæðinga sína of langt frá sér en gerðu heiðarlega tilraun til þess að færast nær en Norðmenn kláruðu dæmið 59-67.

Margrét Rósa Hálfdánardóttir gerði 17 stig og tók 4 fráköst í íslenska liðinu og Eva Rós Guðmundsdóttir var með 10 stig og 8 fráköst. Þá var Eyrún Líf Sigurðardóttir með 7 stig.

Nú er hafinn leikur Íslands og Svíþjóðar hjá U18 körlum. Staðan í hálfleik var 39:34 og nú stendur yfir 3. leikhluti.

Myndbrot úr leiknum: U16 gegn Norðmönnum