Það er óhætt að segja að spennan sé í hámarki á nánast öllum vígstöðvum í Iceland Express deild karla þessa dagana. Nú er aðeins ein umferð eftir og enn er ekki ljóst hverjir verða deildarmeistarar né hvernig liðin raðast í sæti fyrir úrslitakeppnina.

KR og Grindavík eru einu liðin sem geta orðið deildarmeistarar.

KR meistari með sigri
KR getur með sigri á Snæfelli tryggt sér titilinn óháð því hvernig aðrir leikir spilast.

Hvað gerist ef þrjú lið verða jöfn?
Sú staða gæti komið upp að KR, Grindavík og Keflavík verði með jafnmörg stig þegar upp verður staðið.

Hvað gerist þá?
Ef þessi þrjú lið verða öll jöfn þá er farið í innbyrðisviðureignir liðanna og fundið út hvaða lið er með flesta sigra úr viðureignum þessara þriggja liða. Þegar það er athugað kemur í ljós að þau eru öll með tvo sigra. Þá næst er farið í stigaskor úr innbyrðisleikjum liðanna þriggja.

Fyrri umferð:
KR - Grindavík 84:82
Keflavík - Grindavík 97:89
Keflavík - KR 85:100

Seinni umferð:
Grindavík - KR 84:67
Grindavík - Keflavík 76:72
KR - Keflavík 92:100

Þegar þetta er lagt saman þá verður staðan þessi:

1. Grindavík með +11
2. Keflavík með - 3
3. KR með - 8

Hvernig raðast önnur lið?

Sæti 4 til 6
Þá er það baráttan um sæti 4 til 6 sem er á milli Snæfells, Stjörnunnar og Njarðvíkur. Í lokaumferðinni tekur Snæfell á móti KR, Stjarnan fær Breiaðblik í heimsókn og Njarðvík fer á Selfoss og spilar við FSu. Liðin eru í dag öll með 28 stig.

Fari svo að þau vinna öll eða tapa öll þá er Snæfell númer 4, Stjarnan 5 og Njarðvík 6. Eins er ef Snæfell vinnur og annað hvort hinna vinnur og hitt tapar. Snæfell verður því alltaf númer 4 vinni þeir sinn leik. Tapi hins vegar Snæfell og bæði Njarðvík og Stjarnan vinna þá verður Stjarnan númer 4, Njarðvík 5 og Snæfell 6.

Sæti 7 til 10
Þá er komið að baráttunni um síðustu tvö sætin í úrslitakeppninni en hún er á milli Tindastóls, ÍR, Hamars og Fjölnis. Í síðustu umferðinni tekur Fjölnir á móti Tindastóls, ÍR á móti Grindavík og Hamar fer til Keflavíkur. Fyrir umferðina er Tindastóll með 16 stig en hin þrjú liðin með 14.

Vinni Tindastóll Fjölni þá eru þeir öruggir í 7. sætinu. Að þessu gefnu hefur Fjölnir tapað og fari svo að ÍR og Hamar tapi líka þá verður ÍR númer 8, Hamar 9 og Fjölnir 10. Vinni Tindastóll, ÍR og Hamar verður sama röð.

Tapi hinsvegar Tindastóll þá fara hlutirnir að flækjast. Tapi Tindastóll með 14 stigum eða minna og ÍR og Hamar tapa verður Tindastóll númer 7, Fjölnir 8, ÍR 9 og Hamar 10. Tapi Tindastóll eða köllum það að Fjölnir vinni með 15 stigum eða meira og ÍR og Hamar tapa, þá endar Fjölnir númer 7, Tindastóll númer 8, ÍR 9 og Hamar 10.

Fari hinsvegar svo að Fjölnir og ÍR vinni sína leiki og Tindastóll og Hamar tapi þá endar ÍR númer 7, Tindastóll 8, Fjölnir 9 og Hamar 10.

Vinni Fjölnir og Hamar sína leiki og Tindastóll og ÍR tapa þá skiptir máli hversu stór sigur Fjölnis verður, vinni þeir með 1 eða 2 stigum þá endar Tindastóll númer 7, Hamar 8 og Fjölnir 9. Vinni Fjölnir með 3 til 10 stigum verður Hamar númer 7, Tindastóll 8 og Fjölnir 9. Vinni Fjölnir með 11 til 16 stigum verður Hamar númer 7, Fjölnir 8 og Tindastóll 9. Vinni Fjölnir hinsvegar stærra verður Fjölnir númer 7, Hamar 8 og Tindastóll 9.

Það er langt síðan spennan hefur verið svona mikil í lokaumferð og hvetur heimasíðan áhugamenn um körfubolta og íþróttir að skella sér á leik og fá spennuna beint í æð.

Úrslitakeppni Iceland Express deildar karla hefst fimmtudaginn 25. mars.