Magnús Þór ásamt Hannesi Jónssyni formanni KKÍ

Magnús Þór Gunnarsson úr Njarðvík er þriggja-stiga meistari en hann var stigahæstur í úrslitum þriggja-stiga keppninnar sem var í hálfleik á Stjörnuleik karla.

Í úrslitum voru ásamt Magnúsi þeir Sean Burton úr Snæfelli, Andre Dabney Hamri og Guðjón Skúlason þriggja-stiga kóngur frá því í fyrra og núverandi þjálfari Keflavíkur.

Andre Dabney byrjaði og setti 9 stig. Guðjón skoraði jafn mörg. Svo kom röðin að Magnúsi Gunnarssyni sem var sjóðandi heitur og skoraði ótrúleg 16 stig en mest var hægt að fá 20. Næstur kom Sean Burton og gat hann knúið fram bráðabana þegar hann kom að síðasta staðnum en hann klikkaði á einum bolta og endaði með 15 stig.

Úrslit:
1. Magnús Þór Gunnarsson - Njarðvík · 16 stig
2. Sean Burton - Snæfell · 15 stig
3. Guðjón Skúlason - Keflavík · 9 stig
4. Andre Dabney - Hamar · 9 stig