Troðslukeppnin í ár verður örugglega mjög skemmtileg enda verða fjórir miklir háloftafuglar sem taka þátt.

Ólafur Ólafsson sigurvegari keppninnar frá því fyrir tveimur árum er mjög spenntur og hefur skorað á aðra leikmenn að mæta ef þeir þora. Ólafur sýndi frábær tilþrif þegar hann vann keppnina og sagan segir að hann sé í betra formi núna og sé búinn að æfa nokkrar sérstakar troðslur.

Aðrir þátttakendur eru ekki af verri endanum.

Byron Davis leikmaður Vals er með mikinn sprengikraft og hefur sýnt nokkrar troðslur í þeim leikjum sem hann hefur leikið. Til upplýsinga þá hóf Davis leik með Solna Vikings undir stjórn Sigurðar Ingimundarsonar sl. haust og að sögn Sigurðar þá er hann svakalegur troðari þótt bakvörður sé.

John Davis leikmaður Ármanns verður á meðal þátttakenda. John hóf leik með Blikum og er sagður mikill íþróttamaður og líkur á því að hann hristi körfurnar í Dalhúsum eitthvað.

Síðastur en ekki sístur er Semaj Inge leikstjórnandi KR. Semaj hefur átt nokkrar svaðalegar troðslur í leikjum með KR og ljóst að þar fer frábær íþróttamaður.

Á þessu sést að keppnin á morgun verður gríðarlega hörð og nokkur von um að kapparnir verði að prófa erfiðar troðslur til að skera sig úr og vinna. Það er auðvitað það sem áhorfendur vilja.

Troðslukeppnin hefst í kringum 15:00