Ólafur Rafnsson, forseti Íþrótta- og Ólympíusambands Íslands (ÍSÍ), hefur ákveðið að bjóða sig fram til forseta Körfuknattleikssambands Evrópu (FIBA Europe) til næstu fjögurra ára, en kjörtímabili núverandi forseta lýkur um miðjan maí 2010.

FIBA Europe er eitt af fimm svæðasamböndum körfuknattleiks í heiminum og ber ábyrgð á þróun körfuboltans í Evrópu auk þess að fara með yfirstjórn allra körfuknattleiksmála í álfunni.

Framboð Ólafs nýtur stuðnings Katrínar Jakobsdóttur ráðherra íþróttamála og Ólafs Ragnars Grímssonar forseta Íslands. Ólafur hefur unnið mikið og gott starf fyrir íþróttahreyfinguna á Íslandi. Frá árinu 2006 hefur Ólafur gegnt starfi forseta Íþrótta-og Ólympíusambands Íslands. Það er mér og ríkisstjórn Íslands mikil ánægja að styðja við framboð Ólafs, segir meðal annars í stuðningsyfirlýsingu Katrínar Jakobsdóttur mennta-og menningarmálaráðherra.

Ólafur er lögfræðingur að mennt og rekur eigin lögmannsstofu í Hafnarfirði. Hann hefur verið í stjórn FIBA Europe frá árinu 2002 og var síðast kjörinn í stjórnina með góðri kosningu árið 2006. Síðastliðin fjögur ár hefur Ólafur verið varaforseti fjármálaráðs FIBA Europe og forseti áfrýjunardómstóls Alþjóðakörfuknattleikssambandsins (FIBA) auk þess að sitja í ýmsum nefndum og vinnuhópum.

Ólafur Rafnsson hefur verið forseti Íþrótta- og Ólympíusambands Íslands frá árinu 2006 en var áður formaður Körfuknattleikssambands Íslands um tíu ára skeið. Ólafur hóf sjálfur ferilinn innan körfuknattleikshreyfingarinnar sem leikmaður bæði með félagsliði og landsliði Íslands auk þess að þjálfa í efstu deildum bæði karla og kvenna. Ólafur hefur gegnt fjölmörgum trúnaðarstörfum innan íþróttahreyfingarinnar.