Eftir hvíldardag á mánudag lék íslenska liðið æfingaleik gegn Kuwait sem eru hér í mánaðar æfingarferð og urðu lokatölur 103-40 þar sem Haukur Óskarsson var stigahæstur með 20 stig.

Leikmenn íslenska liðsins fóru í fróðlega skoðunarferð um Sarajevo og borðuðu þjóðlegan mat í hjarta borgarinnar. Þeir fræddust um Franz Ferdinand og fleira sem þessi sögufrægaborg hefur að geyma. Síðar um daginn eða klukkan 16:00 að íslenskum tíma var leikið gegn Kuwait sem eru hér í mánaðaræfingarferð í Sarajevo með mikið lið, 18 leikmenn og 9 starfsmenn. Liðið er á aldursbilinu 18 niður í 15 ára stráka sem ætla sér að ná langt í íþróttinni. Hótelstjórinn sem hýsir liðið kom að máli við íslenska liðið og spurði hvort við værum tilbúnir að leika við þá sem við vorum alveg til í að gera enda með tvo frídaga í röð og leikurinn kom í staðinn fyrir æfingu.

Leikurinn byrjaði vel fyrir Kuwait sem skoruðu sjö fyrstu stigin en þar við sat, íslenska liðið sem tefldi fram byrjunarliðinu Daða Berg, Arnþór Frey, Arnari Péturs, Þorgrími Guðna og Ragnari Ágúst bættu verulega í og var staðan í hálfleik 67-18 þar sem allir leikmenn liðsins fyrir utan Hauk Helga Pálsson sem hvíldi léku vel.

Síðari hálfleikur var í eign íslensku strákanna og var leikurinn mjög fín æfing fyrir komandi átök sem hefjast í dag. Lokatölur 103-40.

Stigaskor íslenska liðsins: Haukur Óskarsson 20 stig, Arnar Pétursson 16, Arnþór Freyr Guðmundsson 14, Þorgrímur Guðni Björnsson 11, Daði Berg Grétarsson 8, Sigurður Þórarinsson 7, Ragnar Ágúst Natanelsson og Gunnlaugur Már Briem 6, Trausti Eiríksson og Ægir Þór Steinarsson 5, Tómas Heiðar Tómasson og Björn Ingvi Tyler Björnsson 2 stig hvor.

Liðið var á videofundi fyrir leikinn í dag gegn Ungverjum en fyrirkomulagið í framhaldinu er þannig háttað. Fjögur lið sem enduðu númer 3 og 4 í A og B riðli leika saman í G-riðli og fjögur lið sem enduðu númer 3 og 4 í C og D riðli leika í H-riðli. Taka því Finnar sigurinn á okkur með sér í riðlakeppnina. Íslensku strákarnir leika gegn Ungverjum í dag og á móti Dönum á morgun. Tvö efstu liðin í G-riðli leika við tvö efstu úr H-riðli um sæti 9-12, en tvö neðstu leika um 13-16.

Kveðja frá Sarajevo