Þriðji leikur strákanna í U-18 var gegn Finnum sem voru ósigraðir fram að þessum leik. Bæði lið voru þó án lykilmanna en Arnþór Guðmundsson er meiddur á ökkla en hann snéri sig illa í gær á lokamínútunum gegn Svíþjóð. Finnarnir léku án tveggja manna sem voru skildir eftir á bekknum vegna agabrota.

Byrjunarlið Íslands: Tómas Tómasson, Trausti Eiríksson, Ægir Þór Steinarsson, Haukur Helgi Pálsson og Sigurður Þórarinsson.

Fyrsta karfa leiksins var finnsk en þá kom djúpur þristur eftir nokkrar sekúndur. Reyndust þetta bestu tilþrif Finna í leiknun en íslensku strákarnir lokuðu algerlega á þá finnsku. Ísland náði fljótt foyrstunni og juku hana jafnt og þétt. Þeir leiddu þó aðeins með þremur stigum eftir fyrsta leikhluta 11-14. Tómas Tómasson varð að yfirgefa völlinn snemma í fyrsta leikhluta en hann fékk olnboga frá einum finnska leikmanninum þegar hann var að verjast honum. Það þurfti að sauma fimm spor í hausinn á honum en hann kom ekkert meira við sögu í leiknum.

Í öðrum leikhluta náðu Íslendingar frumkvæðinu og fór það í taugarnar á Finnunum sem áttu erfitt uppdráttar allan leikinn enda gekk ekkert upp hjá þeim. Íslensku strákarnir gengu á lagið og í hálfleik munaði níu stigum 23-32.

Þriðji leikhluti var mjög góður hjá Íslandi en Finnland skoraði aðeins 13 stig í honum. Finnarnir settu fyrstu körfuna en þá kom frábær kafli hjá Íslandi og þeir keyrðu upp muninn. Frábær skotnýting ásamt frábærum varnarleik þar sem Finnarnir áttu í vandræðum í hverri sókn. Strákarnir tóku nánast öll varnarfráköst og keyrðu svo upp völlinn. Þrjár þriggja-stiga körfur á stuttum tíma um miðjan leikhlutann og Ísland að nálgast 20 stiga mun. Leikhlutinn endaði 36-51 fyrir Íslandi.

Ef þriðji leikhluti var eign Íslands þá var sá fjórði aðeins framhald því að strákarnir héldu áfram að auka muninn. Fór hann mestur í 25 stig og hefði auðveldlega getið orðið stærri. Þeir finnsku voru ískaldir og hittu ekkert ásamt því að íslenska vörnin hélt. Sigur Íslands var afar sanngjarn en strákarnir réðu auðveldlega við pressuvörn Finnana og hafði hún engin áhrif á leik Íslands.

Frammistaða liðsins var til fyrirmyndar en þeir léku allan leikinn af krafti og án tveggja lykilmanna Arnþórs og Tómasar sem þurfti að yfirgefa völlinn eftir olnbogaskot.

Stig:
Haukur Óskarsson 20 stig
Ægir Steinarsson 15 stig
Haukur Pálsson 12 stig
Sigurður Þórarsinsson 10 stig
Tómas Tómasson 5 stig
Arnar Pétursson 4 stig
Ragnar Nathaníelsson 2 stig
Þorgrímur Björnsson 2 stig
Trausti Eiríksson, Daði Berg Grétarsson og Björn Tyler Björnsson spiluðu en náðu ekki að skora.