Stelpurnar í U-16 kvenna töpuðu naumlega fyrir Dönum 69-64 í öðrum leik sínum. Stelpurnar voru yfir nánast allan seinni hálfleikinn og áttu allt annað skilið en að tapa þessum leik. Eftir að hafa klúðrað ágætis forystu áttu þær möguleika að jafna í endann en þær töpuðu boltanum og Danir unnu.

Danska liðið hafði frumkvæði framan af í 1. leikhluta en sá kraftur og elja sem var í leik stelpnanna í morgun var ekki til staðar í leiknum í upphafi. Hvort það var þreyta eða einbeitingarleysi sem olli því að liðið byrjaði svona illa skal ekki segja. En danska liðið nýtti sér þetta og komst í 7-0 áður en Ísland setti körfu. Eftir það fóru liðin að skiptast á körfum. Ísland náði þó að minnka muninn og jafna áður en leikhlutinn var allur. Staðan 18-18 eftir fyrsta.

Í öðrum leikhluta var jafnt með liðunum fyrstu mínúturnar. Pressuvörn Íslands var ekki eins beitt og fengu þær því ekki eins mörg auðveld skot og í morgun. En í stöðunni 23-23 kemur frábær kafli hjá Íslandi og þær fara yfir og leiða svo með mest níu stiga mun en það var einmitt munurinn í hálfleik 27-38.

Ísland varði forystuna allan þriðja leikhlutann og leiddu 51-43 að honum loknum. Varnarmenn Dana fóru að spila stífar á bakverðina okkar en það virtist ekki hafa áhrif og stelpurnar héldu sinni forystu. Mikill kraftur var þó kominn í leik Dana og hélt sé kraftur út þriðja leikhluta og inní fjórða leikhlutann en þar fóru hlutirnir að klikka hjá Íslandi.

Leikur Íslands var ágætur alveg fram í miðjan leikhlutann en þá leiddi 59-51 og fátt í spilunum að Ísland næði ekki að landa sigri. En þá kom góður kafli hjá Dönum en þeir þéttu vörnina sína ásamt því að nýta vítaskotin sín og náðu því jafnt og þétt að minnka muninn og þær náðu að jafna leikinn 60-60 þegar 52 sekúndur voru eftir. Danirnir stálu boltanum af Íslandi og fengu tvö önnur víti þegar Ísland braut og þær komust yfir í fyrsta skipti síðan í 2. leikhluta. Danir komust í 64-60 en Ísland minnkaði muninn í 67-64 og vann boltann þegar um 7 sekúndur voru eftir. En þær náðu ekki að skjóta og Danir unnu.

Íslenska liðið átti margt meira skilið úr þessum leik en tap en geiguð sniðskot og of mörg sóknarfráköst urðu liðinu að falli.

Stigahæst hjá Íslandi var Ína María Einarsdóttir með 17 stig.

Stig:
Ína María Einarsdóttir 17 stig
María Ben Jónsdóttir 11 stig
Margrét Rósa Hálfdanardóttir 11 stig
Thelma Ásgeirsdóttir 8 stig
Eva Rós Guðmundsdóttir 7 stig
Berglind Gunnarsdóttir 4 stig
Dagbjört Samúelsdóttir 4 stig
Árný Sif Gestsdóttir 2 stig
Sandra Grétarsdóttir, Árnína Lena Rúnarsdóttir, Hrafnhildur Sævarsdóttir og Sigrún Albertsdóttir léku en náðu ekki að skora.

Næsti leikur stelpnanna er á morgun gegn Svíum kl. 15.00(13.00 að íslenskum tíma)