Þingforseti,
forseti ÍSÍ,
ágætu félagar,

Nú er í fyrsta sinn unnið eftir samþykkt síðast þings okkar þar sem tvö ár hafa liðið á milli þinga. Þar af leiðandi er ársskýrsla okkar núna tveggja ára skýrsla og var ákveðið að breyta aðeins áherslum og ýmsa þætti er nú hægt að nálgast á heimasíðu okkar kki.is sem verið hafa í ársskýrslu eins og úrslit leikja og tölfræði yfir landsliðsfólkið okkar. Ég mun ekki lesa skýrsluna hér heldur fara yfir helstu mál sem í henni eru sem og þeim þáttum sem uppúr standa og við þurfum ræða innan okkar hreyfingar. Ég hvet ykkur því til að kynna ykkur efni skýrslunnar vel því hún gefur greinargóða mynd af starfseminni undanfarin tvö ár.

Ég ætla að hefja yfirferð mína á máli sem ég hef mikið rætt á undanförnum tveimur árum en það er starfsskýrsluskil körfuknattleiksfélaga til ÍSÍ.

Innan körfuboltahreyfingarinnar fer fram eitt stærsta og umfangsmesta mótahald sem haldið úr úti á meðal sérsambanda hér á landi. Iðkaður er körfubolti í 24 af 27 íþróttahéruðum en þrátt fyrir það eru körfuboltin einungis í sjötta sæti yfir fjölmennustu íþróttagreinar landsins með um 5.800 iðkendur.
Miðað við fjölda þeirra körfuknattleiksfélaga sem senda lið til keppni á Íslandsmót og það starf sem fram fer hjá félögunum þá ætti þessi tala að vera mun hærrri. Tölur úr þessum skýrslum eru mjög mikilvægar, t.d. er Lottópeningur greiddur út samkvæmt þessum tölum.

Eitt lítið dæmi er að finna í starfsskýrslum fyrir árið 2008, þar er eitt félag sem er með lið í báðum Iceland Expressdeildunum skráð með 27 iðkendur í allri körfuknattleiksdeildinni – það sjá allir að það gengur ekki upp, það hjlóta að vera fleiri en 27 iðkendur hjá þessu félagi.
Ég hvet ykkur öll til þess að fara yfir skráningarnar í ykkar félögum og minni enn og aftur á að við - stjórn og starfsmenn KKÍ erum boðin og búin að aðstoða ykkur eins og hægt er í þessum málum.

Öll vitum við sem hér erum hvað þjóðfélagið okkar hefur gengið í gegnum síðastliðna mánuði og ekki ætla ég mikið út í þau mál hér. Stjórnmálamenn tala ávallt á hátíðarstundu um mikilvægi íþrótta og þegar stórir sigrar nást koma stjórnmálamenn í bunkum og láta sem þetta sé næstum því þeim að þakka og setja peninga í þá íþróttagrein sem vann til verðlauna.
Þrátt fyrir erfitt efnahagslegt ástand þá megum ekki vera feimin við að vera með kröfur á ríkisvaldið. Ríkisvaldið á að styðja mun betur við sérsambönd þannig að hægt sé að halda úti landsliðum, að yngri landsliðskrakkarnir okkar þurfi ekki að greiða fyrir stóran hluta af sínum kostnaði, hvort sem það er ferðakostnaður innanlands, eða til að fara til keppni erlendis og svo fleira.

Við megum vera með kröfur og við eigum að vera með kröfur á hið opinbera – íþróttahreyfingin er að mörgu leyti gleðigjafinn hjá stórum hluta landsmanna og því miður þá gengur það ekki upp nema með því að fá fjármagn inn í hreyfinguna okkar sem í dag er mjög erfitt.

Undanfarin ár hefur verið mikið aðhald í fjármálum sambandsins en jafnfram hefur allt verið gert til þess að halda úti landsliðsstarfi bæði hjá A-landsliðunum sem og yngri landsliðunum.

Ljóst er að nú þarf að draga verulega úr kostnaði en jafnframt er efitt að finna þann kostnað sem hægt er að skera niður.
Nýrrar stjórnar bíður það verkefni að fara mjög vel yfir núna á næstu dögum og vikum alla þætti starfseminnar og finna leiðir til þess að hagræða sem mest og á réttum stöðum.

Þátttaka A-landsliðanna í Evrópukeppninni er mjög kostnaðarsöm og tekjur á móti kostnaði eru langt frá því að vera nægar og er það atriði sem þarf að fara mjög vel yfir.

Því miður þá er það þannig að KKÍ hefur engan aðgang að neinu íþróttahúsi nema með aðstoð félaganna og sveitarfélaga og er ánægjulegt hversu jákvæð mörg sveitarfélög eru fyrir því að lána okkur sín íþróttahús. Það vantar íþróttahús sem við og fleiri íþróttagreinar gætum notað til æfinga og keppni fyrir okkar afreksstarf – það má segja að það vanti þjóðarleikvang þar sem t.d körfubolti, handbolti og blak hefðu almennilega aðstöðu.

Mig langar að þakka okkar félögum og þeim sveitarfélögum sem hafa lánað íþróttaaðstöðu sína fyrir æfingar landsliða og afreksstarf KKÍ, þetta er ómetanlegur stuðningur við afreksstarfið okkar.

Það mikilvægast hjá sambandinu í nánustu framtíð er að huga sérstaklega vel að grasrótinni okkar – yngri iðkendunum og félögunum okkar sem halda úti öflugu starfi bæði körfuboltalega sem og félagslega.

Áfram mun verða lögð áhersla á það að KKÍ muni styðja við bakið á sínum félögum á allan þann hátt sem félögin óska eftir og KKÍ getur gert. Mikilvægt er því að fá hugmyndir frá félögunum um hvað við, það er stjórn og starfsmenn KKÍ, getum gert til þess að aðstoða ykkar starf í nánustu framtíð.

Nú í byrjun maí stóð KKÍ fyrir körfuboltaskóla þar sem krakkar á aldrinum 8-11 ára gátu komið og fengið leiðsögn hjá A-landsliðsþjálfara sem og leikmönnum A-landsliðanna. Körfuskólinn tókst mjög vel og verður klárlega framhald á þessu hjá okkur.

Unglingalandsmót UMFÍ hafa verið haldin um verslunarmannahelgina undanfarin ár og er þetta frábær vettvangur fyrir fjölskylduna að vera saman þar sem krakkarnir spila körfubolta og fleiri íþróttagreinar. KKÍ og UMFÍ hafa gert samkomulag sín á milli sem felst í því að auka veg körfunnar á unglingalandsmótunum og er það ánægjulegt. Ég hvet ykkur að fjölmenna á unglingalandsmótið í sumar á Sauðárkróki.

Þessi Körfuskóli sýndi okkur að við getum hæglega náð til ungu krakkana með ýsmu móti og mín skoðun er sú að eitt af megin verkefnum nýrrar stjórnar á að vera að fjölga yngri iðkendum í körfunni og við eigum að leggjast öll á eitt við það.
Það er mikil vinna sem fylgir því að vera að starfa innan sérsambands eins og KKÍ og því er það ómetanlegt fyrir hreyfinguna okkar að eiga þá góðu einstaklinga að sem starfað hafa í nefndum sambandsins síðastliðin tvö ár - þakka ég þeim innilega fyrir þeirra veigamikla starf fyrir körfuboltann í landinu.

Að lokum langar mig að þakka stjórnar- og starfsmönnum KKÍ fyrir frábært og gefandi samstarf á þessu starfstímabili,

Áfram körfubolti